Италиянинг «Интер» ва «Милан» клублари янги стадион — «Generali Stadium» лойиҳасини тақдим этди. Бу ҳақда «Интер» клубининг расмий сайти хабар берди.
«Бугун «Интер» ва «Милан» футбол клублари бўлажак уй стадиони — «Generali Stadium» лойиҳасини тақдим этди. У «Сан-Сиро» руҳини янги даврга олиб ўтиш ва Миланнинг янги рамзий иншоотларидан бирига айланишни мақсад қилган.
Ушбу лойиҳа шунчаки футбол стадиони эмас, балки бой тарихга эга икки клубнинг келажагига қаратилган узоқ муддатли сармоядир. Бу кўплаб авлод мухлислари учун янги уй, шунингдек, шаҳарнинг маданий, иқтисодий ва шаҳарсозлик ривожига ҳисса қўшадиган макон бўлади.
Тақдимот катта режаларни амалга ошириш йўлидаги муҳим босқич бўлди. Илк бор «Сан-Сиро» меросига ҳурмат кўрсатадиган ва шу билан бирга келажак футболи талабларига жавоб берадиган, жаҳон даражасидаги шароитларга эга аренанинг яхлит қиёфаси намойиш этилди.
Энди лойиҳа лойиҳалаштириш ва режалаштиришнинг кейинги босқичларига ўтади. Қурилиш ишларини 2028 йилда бошлаш, биринчи учрашувни эса 2031/2032 йилги мавсумда ўтказиш режалаштирилган. Бу барча зарур рухсатномалар олиниши шарти билан амалга оширилади», — дейилади клуб баёнотида.
Қайд этилишича, янги стадионнинг сиғими тахминан 71,5 минг томошабинни ташкил этади.
