«Тенерифе» клубининг 30 ёшли ҳужумчиси Хесус де Мигель Испания Сегундасининг 12-туридан ўрин олган «Андорра»га қарши учрашувда юраги тўхтаб қолганидан сўнг шифохонада вафот этди. Учрашув 2:2 ҳисобида тўхтатилган эди.
Клуб футболчининг вафоти ҳақида расмий баёнот эълон қилди.
«Чуқур қайғу, оғир дард ва ҳозир содир бўлаётган воқеага ишониш қийин бўлган бир ҳолатда “Тенерифе” футбол клуби Хесус де Мигель Аламеданинг 2026 йил 3 ноябрь, сешанба куни соат 08:00 да вафот этганини маълум қилади.
Бу қайғуни енгиллаштира оладиган сўз йўқ. Унинг оиласи, яқинлари ва бугун ушбу оғир йўқотиш муносабати билан қайғураётган бутун “Тенерифе” мухлислари билан биргамиз.
Хесус де Мигельнинг оиласи билдирилган ҳар бир ҳамдардлик ва қўллаб-қувватлаш учун миннатдорлик изҳор этади ҳамда ушбу оғир дамларда уларнинг шахсий ҳаётига ҳурмат билан муносабатда бўлишни сўрайди», — дейилади клубнинг расмий баёнотида.
Учрашувнинг сўнгги дақиқаларида «Андорра» дарвозабони Хесус Овоно де Мигелнинг кўкрак қисмига зарба берган. Шундан сўнг футболчи майдонга йиқилган ва унинг юраги тўхтаб қолган.
2 ноябрь кунидан буён шифохонада бўлган ҳужумчи ҳушига келмасдан вафот этди. Аввалроқ унинг жонлантириш бўлимида мустақил нафас олаётгани ҳақида хабар берилган эди.
Хесус де Мигелнинг оиласи, яқинлари ва «Тенерифе» клуби мухлисларига чуқур ҳамдардлик билдирамиз.
