Саудия Арабистонининг "Ал-Иттиҳод" клуби бош мураббийи Йенс Виссинг ОФК Элит Чемпионлар лигасининг 3-туридан ўрин олган "Нефтчи"га қарши учрашув олдидан ўз фикрларини билдирди.

Немис мутахассиси Фарғонада ўтказилган матбуот анжуманида жамоасининг тайёргарлиги, рақиб имкониятлари ва ўйиндан кутилаётган натижа ҳақида гапирди.

"Биз дастлабки икки турда йўқотилган очколарни қоплаш ва мусобақадаги иштирокимизни муваффақиятли давом эттириш учун ғалаба қозонишни истаймиз.

"Нефтчи"ни яхши ўргандик. Бу Ўзбекистон чемпионатида пешқадамлик қилаётган, ҳужумда хавфли ҳаракат қиладиган кучли жамоа. Шунинг учун бизни қийин ўйин кутаётганини яхши тушунамиз.

Ўзбекистондаги совуқ ҳаво биз учун муаммо бўлмайди. Футболчиларимиз турли иқлим шароитларига мослаша олади.

Тақвимнинг тиғизлиги таркиб танлашда муайян қийинчиликлар туғдирмоқда. Айрим футболчилар менинг тактик талабларимни аллақачон тушуниб олган, бошқаларига эса янги услубга мослашиш учун кўпроқ вақт керак", — деди Виссинг.

Эслатиб ўтамиз, "Нефтчи" ва "Ал-Иттиҳод" ўртасидаги учрашув бугун, 26 октябрь куни Фарғонадаги "Истиқлол" стадионида ўтказилади. Баҳс Тошкент вақти билан соат 18:45 да бошланади.