Гандбол бўйича Ўзбекистон аёллар терма жамоаси Индонезия пойтахти Жакарта шаҳрида старт олган Осиё чемпионатидаги иштирокини мағлубият билан бошлади. 12 март куни бошланган ва 24 мартга қадар давом этадиган қитъа чемпионати шу йилнинг декабрь ойида Данияда ўтказиладиган жаҳон чемпионатига саралаш вазифасини ўтаб бериши билан аҳамиятлидир.
Кеча терма жамоамиз Осиё чемпионати гуруҳ босқичидаги илк учрашувини хитойлик дугоналарига қарши ўтказиб, 17 та тўп фарқи билан 25:42 ҳисобида имкониятни бой бериб қўйди. POPKI Sport Hall аренасида бўлиб ўтган ўйинда Гулмира Нажмиддинова 5та, Анжелина Голоскокова ва Екатерина Халимуратова рақиб дарвозасини 4 маротабадан ишғол қилишди.
Гуруҳимиздаги иккинчи ўйинда Гонконг терма жамоаси мезбон Индонезиядан 39:10 ҳисобида устун келди. Бугун терма жамоамиз Қозоғистон гандболчилари билан ҳисоб-китоб қилишади. “А” гуруҳидаги иккинчи ўйинда Жанубий Корея Терма жамоаси Эронни йирик 60:11 ҳисобида таслим этди.
Эслатиб ўтамиз, Осиё қитъаси учун жаҳон чемпионатига 3,5та ўрин ажратилган бўлиб, совринли учликдан жой олган терма жамоалар тўғридан-тўғри ЖЧ-2015 йўлланмасига эга бўлишади. Бронза медали учун баҳсда мағлуб бўлган терма жамоа эса плей-оффда бошқа қитъа жамоаси билан йўлланма тақдирини ҳал қилади.
