Ўзбекистон миллий терма жамоаси бош мураббийи Миржалол Қосимов, Жанубий Корея ва Япония терма жамоаларига қарши бўлиб ўтадиган ўртоқлик учрашувларида иштирок этадиган футболчилар рўйхатини эълон қилди.

Эслатиб ўтамиз, Қосимов жамоаси дастлаб, 27 март куни Жанубий Корея футболчиларига қарши майдонга тушса, 31 март куни Токиода Япония терма жамоасига қарши баҳс олиб боради.

Ўзбекистон терма жамоаси аъзолари Тошкентда 23 март куни йиғилишади ва бир кун ўтгач, улар Жанубий Корея пойтахти Сеулга йўл олишади. Японияга эса, терма жамоа делегацияси 28 март куни йўл олади.

Миллий терма жамоа таркибини эълон қилар экан, бош мураббий Миржалол Қосимов, фурсатдан фойдаланиб, Ўзбекистон аҳолисини кириб келган Наврўз байрами билан табриклади.

“Авваламбор, барча юртдошларимизни мамлакатимизга кириб келган Наврўз байрами билан ўз номимдан ва футболчилар номидан табрикламоқчиман. Юртимиз ҳамиша тинч ва осойишта бўлсин, ватандошларимизга эса, соғлик ва омонлик тилайман. Ўз навбатида биз, бизга муҳлислик қилаётган инсонларни ишончини оқлашга ҳаракат қиламиз”, - дейди Қосимов.

“Янги мавсумда бизни кўплаб қизиқарли ва осон бўлмаган учрашувлар кутиб турибди. Ушбу ўйинлар олдидан Жанубий Корея ва Япониядек Осиёнинг энг кучли жамоаларига ўртоқлик учрашувларини ўтказиш жуда фойдали” – дея, қўшимча қилди бош мураббий.

Қуйида, Жанубий Корея ва Япония терма жамоаларига қарши кечадиган учрашувларга таклиф қилинган футболчилар рўйҳати келтирилган.