Испания терма жамоаси ва “Челси”нинг асосий ҳужумчиси Диего Коста 22 март куни “Халл Сити”га қарши сафар ўйинида тиззасидан жароҳат олган ва шу жароҳат туфайли Испания термасининг икки ўйинида ҳам қатнаша олмаганди.

“Диего кечадан умумий гуруҳ билан машғулотларга киришди. У “Сток Сити” билан ўйинга тайёр. Лекин уни асосий таркибда ёки захирадан майдонга туширишим борасида аниқ қарорга келмадим. У тузалганига ҳали кўп вақт бўлгани йўқ”, - дейди Моуриньо “Челси” расмий сайтига берган интервьюсида.

У жамоанинг яна бир футболчиси Жон Оби Микел жароҳатдан фориғ бўлганини, лекин ҳали спорт формасини тўлиқ тикламагани учун “Сток Сити”га қарши ўйнаши мумкин бўлган футболчилар рўйхатига киритилмаганини маълум қилди.

“Челси” бугун, Лондонда АПЛнинг 31-тури доирасида “Сток Сити”ни қабул қилади.

Диего Коста айни вақтда 19 та гол урган ҳолда АПЛ тўпурарлари рўйхатида “Тоттенхем” ҳужумчиси Харри Кейн билан қўшпешқадамлик қилмоқда.