УЕФА 2017 йилда мақоми бўйича жаҳон чемпионати финалига тенг бўлган, футбол тарихида биринчи марта ўтказилаётган «Барча юлдузлар ўйини»ни ўтказишни режалаштирмоқда. Агар бу ғоя амалга ошадиган бўлса, айни пайтда футболчилар учун эталон бўлиб хизмат қилаётган икки буюк ўйинчилар - Роналду ва Месси бир жамоада тўп сура олишлари мумкин бўлади.
Умуман олганда, энг яхши спортчилар иштирокида ўртоқлик ўйини ўтказиш ғояси янгилик эмас. Америкада бундай тадбирлар жуда кўп кузатилади. Жумладан, Миллий баскетбол ассоциацияси (НБА)да бу анчадан бери мавжуд. НХЛ ҳам бундан мустасно эмас. Зеро, бундай «шоу»га мухлислар ҳеч қачон бефарқ қолишмайди. УЕФА эса ғоясига кўра, футболчилар икки минтақага ажралишади - «Шимол» ва «Жануб». Бунда футболчининг қаерда туғилгани эмас, айни вақтда қайси мамлакат чемпионатида иштирок этаётгани муҳим. «Шимол» жамоасига Англия, Германия, Голландия ва Россия ички биринчиликларида тўп суриётган футболчилар таклиф этилади. Португалия, Испания, Франция ва Италия лигаларидаги юлдузлар эса «Жануб» жамоаси шарафини ҳимоя қилишади. Яна бир муҳим шартга кўра, бир клубдан ошиғи билан уч футболчи терма жамоага таклиф қилиниши мумкин. Демак, «Шимол» ҳеч қачон фақат «Челси» ёхуд «Бавария» аъзоларидан ташкил топмайди. Тўғри, ҳали 2017 йилгача анча бор ва унгача таркиблар биз ўйлагандек бўлиб чиқмаслиги ҳам мумкин. Лекин ғоя туғилди ва бизда тахминларга асос бор. Шундай экан, келинг, ҳозирча жамоаларнинг тахминий таркибларини тузиб турайлик...
«Шимол жамоаси
Дарвозабон:
Мануэль Нойер («Бавария», 29 ёш)
«Бавария» дарвозабонини ҳозирда сайёранинг энг кучли дарвозабонларидан бири десак, хато қилмаган бўламиз. Энг қизиғи, унинг хаёлида «Олтин тўп» ҳақида фикрлар умуман бўлмаган. Ўтказган қуруқ ўйинларини айтмай қўя қолайлик-да, сўзларидан иқтибос келтирамиз: «Ҳеч қачон ички кийимлар рекламасида қатнашмайман. Мен модел эмас, футболчиман». Нойер бунга арзийди.
Ўнг қанот ҳимоячиси:
Бранислав Иванович («Челси», 31 ёш)
Келиб-келиб сербиялик футболчи бундай мақомдаги учрашувда қатнашса-я, дерсиз. Бранислав яккакурашларда тенг келиб бўлмайдиган футболчилардан биридир, унинг гавда тузилиши ва ақли бинойидек ҳимоячилардан.
Марказий ҳимоячи:
Матс Хуммельс («Боруссия» Дортмунд, 26 ёш)
Юрген Клопп қўл остида бошпана топган Хуммельс, 8 йил ичида ўзининг амплуаси бўйича дунёда кўзга кўринган ҳимоячилардан бири бўлишга улгурди. Ҳар йили етакчи жамоалар Матсни сотиб олиш учун ҳаддан зиёд пул таклиф этиб келишмоқда. Ким билади дейсиз, балким Клопп кетганидан сўнг «Бавария» ўз тарбияланувчисини яна таркибига қўшиб олар.
Марказий ҳимоячи:
Жером Боатенг («Бавария», 26 ёш)
Жером гарчи омадсиз футболчи саналсада бу рўйхатдан жой олишга ҳақли. Зеро, Боатенг «Бавария»нинг синмас ҳимоячиларидан биридир. Балки, амалдаги жаҳон чемпиони Германиянинг чўққига чиқишига ва «Бавария»нинг ЕЧЛдаги омадли юришларига сабабчи футболчилар туридан бўлиши ҳам бор гап. Тан олиш керак Боатенгга ўхшаганини топиш ҳар бир жамоа учун мушкул вазифа.
Чап қанот ҳимоячиси:
Давид Алаба («Бавария», 22 ёш)
Давиднинг алоҳида ажратиб кўрсатадиган томони, унинг жасурлигидадир: у ҳар қандай рақиб ҳар қандай жамоа билан бир хил руҳиятда ҳаракат олиб боради. Ҳимоячи чап оёғини ишлатганда уни тўхтатиш ҳақида баъзи бир футболчилар ўйланиб ҳам қолишади. Шунингдек, Алаба жарима зарбаларини қойилмақом тарзда ижро этиш устаси, агар ишонмасангиз ЦСКА дарвозабони Игорь Акинфеевдан сўраб кўринг, у бу гапларга қўшилиши турган гап.
Таянч ярим ҳимоячиси:
Яя Туре («Манчестер Сити», 31 ёш)
Бу футболчи сайёрамиздаги барча жамоага фойда олиб келиши шубҳасиз. Унинг зарбалари рақибларни ҳайратга туширади, тўпни олиб қўйишидан футболчилар озгина хаёлот оламига кетиб қолишлари аниқ. Унинг узатмаларидан сўнг жамоадошлари рақиб дарвозаси ёнида хавфли ҳужумлар қилиб гол уришга ҳам кўп маротаба эришишади. Турени тўп билан кетаётганида тўхтатиш учун эса ҳозирда Японияда янги футбол машинаси ихтиро этилаётгани ҳақида гап-сўзлар бор. (Ҳазил)
Марказий ярим ҳимоячи:
Сеск Фабрегас («Челси», 27 ёш)
Венгернинг яна бир бевафо шогирдларидан бири Сеск ҳозирги вақтга келиб «Челси»нинг етакчиларидан бирига айланган. Арсен Венгер эса уни жамоада олиб қололмагани учун афсус қилаётганини ўзи ҳам таъкидлади. Фабрегас каби ақлли ва чаққон футболчи фақатгина «Арсенал»га эмас, балки дунёдаги барча жамоаларга зарур бўлиб турибди.
Чап қанот ҳужумчиси:
Эден Азар («Челси», 24 ёш)
Бельгия термаси ва «Челси» жамоасининг ҳақиқий юраги ҳисобланган Азар бу йил Англиядаги учинчи мавсумини ўтказмоқда. Агар Эден Англия чемпионатида яна битта гол киритса жамоадагининг ўрни шахсий рекордини янгилашга эришади. Ўтган мавсумда Азар 14та гол киритиш билан чекланганини аълоҳида ёдга олиб ўтиш лозим. Энди у Бельгия терма жамоасини ҳам юксакларга олиб чиқса ажаб эмас. Бу мавсумда Англиянинг энг яхши футболчиси номини олган футболчига тилагимиз юлдузли онлар ҳали олдинда, Азар!
Ўнг қанот ҳужумчиси:
Халк («Зенит», 28 ёш)
Халк айнан Япония жамоаларидан бирида «Порту» таклифини қабул қилади ва ажабланарли ҳаракатлари билан «Зенит» вакилларига ёққан футболчи ҳозирга келиб Санкт-Петербург шаҳрининг тирик афсоналаридан саналади. Меҳнаткаш Халкнинг орзулари эса яна бир йилга суриладиган бўлгани ташвишли воқеалардан бири.
Ҳужумчи:
Серхио Агуэро («Манчестер Сити», 26 ёш)
Агуэросиз «Манчестер Сити»ни тасаввур этиш қийин. Аргентиналик футболчи яқинда ўзининг «шаҳарликлар» сафидаги 100-голини киритди ва бу анъанани давом эттиришда ҳаракат қилиши яққол кўзга кўриниб турибди. Балким, Серхио ажойиб голлари билан рекордларни янгилаб, машҳурликда янада олдинги қаторларга жойлашиб олар.
Ҳужумчи:
Томас Мюллер («Бавария», 25 ёш)
Афсонавий Герд Мюллер билан фамилиядош бўлиш Томасга ватандошининг қайд этган натижаларини қайтаришга туртки бўла олмади. У иккинчи ҳужумчи сифатида майдонда харакатланса-да, фаолияти давомида 150 дан ортиқ голларга муаллифлик қилганини алоҳида ёдга олиб ўтиш зарур. «Бавария» жамоаси эса Томасга улкан ишонч билдирганига кўп вақт бўлган.
---------------------------------------------
«Жануб» жамоаси
Дарвозабон:
Жанлуиджи Буффон («Ювентус», 37 ёш)
«Юлдузлар жамоаси»нинг дарвозабони ўрнига буюк Буффондан бўлак номзод сайёрада топилмайди, бизнингча Итальян тилида Буффон сўзининг синоними «буюк» деган маънони англатар экан. Балким, бу дарвозабонга бошқа изоҳ ҳам шарт эмасдир. Бу сиз таниган ўша буюк дарвозабон Жанлуиджи Буффондир!
Ўнг қанот ҳимоячиси:
Серхио Рамос («Реал», 28 ёш)
Рамос учун ўнг қанотда харакатланиш бегона одатлардан эмас. Ҳимоячини марказга ўтказиш фикри эса беназир Жозедан чиққан. Рамос майдонда бош билан ёки яккакурашларда енгилганини кўп вақтдан буён «Реал»нинг учрашувларида кузатиш умуман мумкин бўлмай қолган. Ҳақиқий ҳурматга лойиқ бўлган футболчилардан бири Серхио Рамоснинг ўрни «Юлдузлар жамоаси»да айнан ўнг қанотда.
Марказий ҳимоячи:
Тиаго Силва («ПСЖ», 30 ёш)
Тиаго ўзининг очилмаган қирраларини Миланда очишга эришди. Шундан сўнг, дунёнинг энг яхши ҳимоячиси сифатида совринларни қўлга киритиш учун ПСЖга ташриф буюрди. Силванинг бу йилги орзуларини армонга чиқарган инсонлар сифатида Давид Луис ва Луис Суаресларни кўрсатган бўлар эдик. Айнан Давиднинг хатолари эвазига ПСЖ дарвозасига кетма-кет голлар киритилиб, у ЕЧЛ турниридан эрта махрум бўлди. Франция чемпионатида эса умид ҳали пучга чиқмаган.
Марказий ҳимоячи:
Жерар Пике («Барселона», 28 ёш)
Пикенинг маҳорати туфайли «Барселона» ва Испания терма жамоаси анча-мунча совринни ўз музейида сақлаб келмоқда. Жерар Пикенинг совринлар турадиган хонаси совринлари бўйича Мессиникидан кам эмаслигини ҳисобга олсак, уни ўз даврининг энг яхши футболчиларидан, дея бемалол айта оламиз. Пике бир томондан омадли футболчилардан биридир. Фаолияти давомида Европа, Жаҳон чемпионати ва энг эътиборлиси «Юлдузлар жамоаси»га таклиф этилганининг ўзи омадга ҳам боғлиқдир.
Чап қанот ҳимоячиси:
Марсело («Реал», 26 ёш)
8 йил аввал Марселони бундай даражага етиб келишини етти ухлаб тушингизга киргизмаган бўлар эдингиз. Доимий захира ўриндиғига михланган Марселонинг ўрнида Ройстон Дренте фаол ҳаракатланар эди. Ҳозирда Марсело билан жамоада рақобат олиб борадиган футболчи деярли йўқ. Фабио Коэнтрау ва Денис Черишевлардек рақобатчилар аллақачон Марсело билан рақобатни четга суриб, тақдирга тан беришган.
Марказия ярим ҳимоячи:
Артуро Видаль («Ювентус», 27 ёш)
Кроос-Видаль-Ренато Аугустонинг «Байер»да кўрсатган ўйинларини бир эслаб кўринг. Футболчиларнинг йўллари эса бир зумда алмашиниб кетди. Кросс ижарадан яна «Бавария»га қайтди ва жаҳон чемпионлиги унвонига эришди, Аугусто бразилиялик ватандошлари сингари ватанига қайтди, Видальнинг эса янада мартабаси ошиб, «Ювентус»га келиб қўшилди. У ҳам ҳужумда, ҳам ҳимояда мустаҳкам харакатлари билан «Ювентус»га бу йил Италия чемпионлиги балки ЕЧЛда ғолиб бўлишни ҳам тортиқ қила олишга қодирдир.
Марказия ярим ҳимоячи:
Поль Погба («Ювентус», 22 ёш)
Погба буюк жамоанинг йўл қўйган улкан хатоси. «Манчестер Юнайтед»га алам қилгани, Погбанинг ҳозирда «Ювентус»да кўрсатаётган ўйинидир «МЮ»дан кетганидан сўнг у сайёрадаги энг ёш футболчилар ичида тенгсизликни ўзи томон оғдирди. Унинг Видал билан биргаликдаги ўйиннинг четдан кузатган инсон ҳақиқий саънат асарига гувоҳ бўлиши табиий. Бу икки футболчини фақат «Ювентус»да эмас, «Юлдузлар жамоаси»нинг таркибида ҳам кўргимиз келди.
Ўнг қанот ҳужумчиси:
Лионель Месси («Барселона», 27 ёш)
4 та олтин тўп соврини ва яна бир дунё совринлар, бу футболчининг индивидуаллигининг исботидир. ЕЧЛдаги икки карра чемпионлик, Испания чемпионлиги, Испания кубогига эгалик. Фаолияти давомида 400дан ортиқ голлар ва шунча ҳисобдаги тўп узатишлар. қандай қилиб бундай истеъдод эгасини назардан четда қолдириш мумкин.
Чап қанот ҳужумчиси:
Неймар («Барселона», 23 ёш)
Бразилия терма жамоаси ва «Барселона» келажаги. Месси фаолиятини тугатганидан сўнг янги Месси сифатида айнан Неймарни «Барселона»да кўриш - бу қизиқарли бўлиши табиий.
Ҳужумчи:
Криштиану Роналду («Реал», 30 ёш)
У 30 ёшга тўлиб бўлди, лекин ҳали-ҳамон 22 ёшли футболчига ўхшаб ҳаракатланишда давом этиб келяпти. Дунёнинг 3 карра энг яхши футболчиси сифатида ҳозиргача ҳар-хил жамоаларда икки маротаба ЕЧЛ чемпиони ва, ниҳоят, футбол тарихида ҳеч қайси футболчи бажармаган рекорд - бу ҳам бўлса, 500 марта рақиблар дарвозасини ишғол қилиш бўйича Ронага ҳали бирор-бир футболчи яқинлаша олмайди.
Ҳужумчи:
Златан Ибрагимович («ПСЖ», 33 ёш)
Бундай бўй ва гавда билан дунёнинг исталган терма жамоаси сафига киришга ҳақли футболчилардан бири Златан Ибрагимовичдир. Швеция футболида Златанга ўхшаган футболчилар яқин асрларда туғилишлари гумон остида қолмоқда. Бундай футболчини «Юлдузлар жамоаси»да асосий ҳужумчи сифатида майдонда кўриш нақадар ёқимли бўларкин. «Юлдузлар»нинг беллашувига гувоҳ бўлиш учун 2017 йилни интизорлик билан кутишга киришинг ва футболдан узоқлашманг.
Акмаль Эшонхонов тайёрлади
