АҚШнинг Лас-Вегас шаҳридаги “MGM Гранд” аренасида ярим ўрта вазн тоифаси WBC, WBA ва WBO йўналишлари чемпионлик камари учун замонамизнинг икки буюк жангчиси – Флойд Мэйвезер ва Мэнни Пакьяо ўртасида “аср жанги” ўтказилди.
12 раунд давом этган жанг давомида филиппинлик боксчи ҳужум қилди. Айниқса, жангнинг ўрталарида у бир нечта зарбалардан иборат серияларни амалга ошириб, рақибини қийин аҳволга солиб қўйди. Флойд Мэйвезер эса асосан қарши ҳужумда ҳаракат қилди, яккалик зарбалар орқали очко ишлаш пайида бўлди.
Учала ҳакамлар эса бир овоздан Мэйвезерни ғолиб дея эълон қилишди. Ҳакамларнинг баҳолари қуйидагича бўлди: 118-110, 116-112, 116-112.
Шу тариқа, Пакьяо ҳисобига олтинчи мағлубият ёзилган бўлса, Мэйвезер 48-ғалабасини қўлга киритди. У ҳамон мағлубият нималигини билмаган боксчи бўлиб турибди.
Жангдан кейин ўз фикрини билдирар экан, Мэнни Пакьяо ўзини ғолиб дея эълон қилди. "Мен бугун ғалаба қозондим. Ҳужум қилдим, бир нечта зарбалар бердим. Мэйвезер эса фақат ҳимояланди ва ринг бўйлаб менинг ҳужумларимдан қочди. У кучли боксчи, унинг ўнг қўлдаги бериладиган зарбаларини кутгандим. У мени ҳеч бир жиҳати билан ҳайрон қолдирмади. Яна такрорлайман, мен бугун ғалаба қозондм", - дейди филиппинлик боксчи.
