Авваламбор, бу мақолани ёзишдан олдин кўп ўйладим, шу менга керакми деб. Мутахассислар жамоани мағлубиятлар гирдобида тушиб қолганини айтиш, айбдорларни излаш билан овора, ҳеч ким ундан чиқиш йўлини кўрсатмаяпти. Ҳақиқий мухлислар эса шокда, бунақаси ҳали жамоа тарихида бўлмаган.
Жамоа қачон бундай ачинарли аҳволга келди? Бундай натижаларга олиб келган ҳолатлар илдизи қаерда? Бундай натижалар жамоадан Агамуродов кетгандан кейин бошландими? Ҳозирда бутун жамоа мухлислари ва мутахассисларининг ўй- хаёлларини шу саволлар қамраб олган. Бу саволларга ҳаминқадар жавоб топишга ҳаракат қиламиз.
Бир нарса аниқки, жамоани шу аҳволга келишига барча Бухоро аҳли айбдор десак хато бўлмайди. Буни қуйидагича изоҳлайман.
Биринчидан: Ҳозирда чемпионатимизда етакчи ўринларда бораётган жамоалар асосан ўз маҳаллий тарбияланувчиларини сақлаб қолиш эвазига ёки катта маблағ эвазига жамоа таркибига тажрибали мутахассис ва футболчилар (легионерлар)ни жалб қилган ҳолда юқори мақсадларни кўзламоқда. Бизда эса жамоага футболчи етказиб берадиган аниқ базанинг ўзи йўқ. Қандайдир мўжизалар орқали қидириб топган маҳаллий футболчи ва мутахассисларимизни қадрига етмаяпмиз, уларга ишонмаяпмиз ёки имконият бермаяпмиз.
Мисол учун охирги беш йилни оладиган бўлсак келажаги порлоқ деб кутилаётган К.Самиев, О.Шамсиддинов, А.Акрамов, Б.Омонов, М.Шабанов, М.Рахимов, Ш.Сулаймонов, А.Муродов каби бир қатор футболчиларимизни қайсидир “ақлли” мутахассисларнинг қарорлари билан деярли йўқотиб бўлдик. Шунингдек У.Бақоев, Ж.Хасанов, Ш.Саломов, А.Ражабов, С.Қобилов, У.Рамазонов каби маҳаллий футболчилар кимларнидир эътиборсизлиги ёки нотўғри футбол сиёсати туфайли олий лиганинг бошқа жамоаларида тўп тепиб келишмоқда. Шахсан мен ҳозирда жамоада тўп сураётган “легионерларимиз”дан кўра бу футболчиларни ўн марта устун қўяман.
Иккинчидан: Бухоро азалдан ўз футбол услибига эга бўлиб келган жамоалардан ҳисобланади. Бу шундай услубки 2005 йилларгача жамоада мураббий ёки футболчилар алмашган тақдирда ҳам, жамоа ўз услибидан четга чиқмаган, асосан маҳаллий футболчилар эвазига жамоа метин ҳимоя, қисқа паслар, жанговор ҳужумчилари билан ҳар бир жамоага бош оғриғи бўлиб келган. Айниқса дарвозабонлар жамоа лидери бўлган. Усмон Тошевнинг мураббийликдаги истеъфосидан кейин жамоанинг миллий услубига путур етди. Мураббийлар маҳаллий футболчиларга деярли эътибор қаратишмади. Охир оқибат шундай оқибатларга олиб келдики Т.Агамуродов даврида айрим ўйинларда ҳаттоки бирта ҳам маҳаллий футболчи асосий таркибга кўринмади. Ваҳоланки бу даврга келиб жамоани миллий ўйин услубидан асар ҳам қолмаганди. Биз мухласлар ва маҳаллий мутахассислар Агамуродов жамоасининг вақтинчалик ғалабаларига ўзимизни овутиб юравердик. Эртани ўйламадик. (Бунга мен Т.Агамуродовни айбламоқчи эмасман. Четдан келган мураббийнинг асосий вазифаси бу натижа. У ҳаммасини тўғри бажарди). Ҳозирга келиб эса 10 та ўйиндан бирортасига ғалаба қозона олмайдиган аҳволга келиб қўйдик.
Ҳозирда бу ҳолатдан чиқиб кетишнинг йўлини барча ўйлайдиган вақт келди. Бу ҳолатдан чиқиб кетиш учун мен жамоа мухлиси сифатида қуйидагиларни таклиф қиламан.
Биринчидан: Жамоага максимал даражада маҳаллий мураббий ва ўйинчиларни ёки Бухоро футболи тарбияланувчиларини қайтариш ҳамда футболчилар билан камига икки йиллик шартнома тузиш. Бошқа футболчилар билан шартнома имзолаганда ўз позициясида маҳаллий футболчилардан қанчалик устун эканлигига алоҳида этибор қаратиш. Ўз навбатида маҳаллий футболчилар ҳам пулдан кўра жамоа манфаатини устун қўйиш вақти келди менимча.
Иккинчидан: Жамоа бош мураббийлигига Бухоро футболини яхши биладиган маҳаллий мутахассисни жалб қилиш. Бир гапни кези келганда айтиб ўтиш керак: жамоанинг ҳозирги вақтинчалик мураббийи Шухрат Файзиев ва унинг мураббийлар штаби ҳам маҳаллий футболимиз тарбияланувчилари ҳисобланади, ўз кўз ўнгимизда футбол ўйнаб меҳримизни қозонган. Ҳозирда улар Мочиновдан қолган чўкаётган кемага қутқарувчи вазифасини бажармоқда. Жамоа мухлислари ва мутасаддилари уларга имкон беришимиз ва қўллаб қувватлашимиз, кези келганда тўғри кўрсатмаларимизни аямаслигимиз зарур. Ахир уларни биз қўллаб қувватламасак, улар кимга таянади.
Учинчидан: Жамоага саёхатчи легионерларни олиб келишдан бутунлай воз кечиш вақти келди. Керак бўлса бунга ҳозирдан кескин чоралар кўриш керак. Жумладан ҳозирда жамоада тўп сураётган Богдан Хауши, Вадим Кравческу каби легионерлардан жамоанинг ёшлар лигасида тўп сураётган футболчиларни кучли деб ҳисоблайман. Жамоани ушбу мавсумда ўтказиб юборилган голларининг 50% мана шу легионерларнинг хатолари эвазига юзага келди. Бундай легионерлардан нафақат жамоа, балки истеъдодли ёш маҳаллий футболчилар ҳам заҳирада қолиб кетишдан азият чекмоқда.
Тўртинчидан: Вилоят телевиденияси ва маҳаллий газеталарда жамоа ўйинлари ҳақида таҳлилий, керак бўлса танқидий кўрсатувларни ташкиллаштириш вақти келди. Яқин икки йилда жамоа ҳақида вилоят телевидениясида бирорта ҳам таҳлилий ёки танқидий кўрсатув эфирга узатилмаганига нима дейсиз? Вилоятда футбол журналисти борми ўзи?
Бешинчидан: Жамоа мухлислари ҳам майдонга фақат “семичка” чақиб ўтирмасдан, жамоани охиригача қўллаб қувватлашимиз керак.
Олтинчидан: Раҳбарият жамоа мухлислари илтимосини инобатга олиб жамоамизга "Нурафшон" номини қайтариш ҳамда жамоа академиясини ташкил этиш чораларини кўриши вақти келди деб ҳисоблайман. .
Шу нарса аниқки бутун Бухоро аҳли бирлашсакгина биз хохлаган жамоа “Нурафшон” яна қайтади.
Акбар Ҳалимов, Бухоро
