"Барселона" ҳужумчиси Лионель Мессининг Аргентина миллий терма жамоаси сафидаги биринчи учрашуви ўн йил аввал, 2005 йилнинг 17 августида бўлиб ўтган эди.
Аммо ёш футболчи Венгрия терма жамоасига қарши дебют учрашуви 45-секунддаёқ тўхтаган эди. 64-дақиқада Лисандро Лопеснинг ўрнига майдонга тушган Месси рақиби Вилмош Ванчекнинг юзига тирсаги билан ургани учун қизил карточка олиб, майдонни тарк этганди.
Шундан сўнг Месси терма жамоа сафида 100 та учрашув ўтказди ва 46 та гол урди. Унинг 100-юбилей учрашуви Америка кубогида Ямайкага қарши ўйин бўлди.
Месси аргентиналик тўпурарлар орасида натижа бўйича Габриель Батистутадан кейин турибди. Батигол терма жамоада 56 та гол урган. Ўтказилган ўйинлар бўйича у бешинчи бўлиб турибди. Мессидан олдин Хавьер Дзанетти (145 ўйин), Роберто Айяла (115), Хавьер Маскерано (114) ва Диего Симеоне (106) жой олган.
