Терма жамоамиз мураббийлар штабидаги маълуму-машҳур ўзгаришлардан кейин МТЖ атрофида «янгиликлар тасмаси» тиним билмай айлана кетди. Қизиғи шундаги, бу янгиликларнинг аксарияти кўпчилик мухлислар кутган воқеалардан иборат.
Ўтган ҳафтанинг охири, янги ҳафта аввалида терма жамоамиз бош мураббийи аввалига ОАВ вакиллари, кейин эса мухлислар билан учрашди. Бу учрашувлар албатта, ўз вақтида бўлди ва жуда ҳам зарур тадбирлар эди. Чунончи, кўпчилик ҳамкасбларимиз Самвел Бабаянни «Пахтакор» бош мураббийи сифатида яхши билишса-да, унинг янги, масъулиятли вазифада қандай сўзлашини кўриш, фикрлари билан танишиш, режаларидан бохабар бўлиш, барибир, қизиқ эди.
Якунда маълум бўлдики, мутахассиснинг ўзини тутишида ортиқча ўзгаришлар йўқ: олдингидек сўзга чечан, ишда ҳаракатчан. Энг муҳими, у зиммасига юкланган вазифа қанчалик муҳим эканини тушуниб турибди. Жумладан, янги лавозимнинг илк кунлариданоқ барча билан бир ёқадан бош чиқариб ишламоқчи эканини рўйи-рост маълум қилди. Тўғри, бу ишни вазифага тайинланган ҳар қандай мутахассис қилиши мумкин. Лекин ҳамма ҳам ваъдасини бажаришга дарҳол киришавермайди. Бабаян эса киришди.
Биз бу билан Самвел Вячеславовични мақтамоқчи ёки жамоатчиликда унга нисбатан хайрихоҳлик уйғотишни мақсад қилмаяпмиз. Бизнинг вазифамиз - бўлиб ўтган воқеа-ҳодисага холис ёндошиш.
Энди Бабаяннинг ишга қандай киришганини баён қилсак. Энг асосийси, у МТЖ мухлислари ҳужум чизиғидан норози эканликларини инобатга олиб, Гейнрихни сафга қайтариш нияти борлигини айтди. Сашанинг термадаги даври ўтиб қолганини албатта, кўпчилигимиз жуда яхши биламиз. Лекин янги авлод футболчилари ичидан ҳеч бўлмаса, Гейнрих даражасидаги ёш, иштиёқи кучли ҳужумчи чиқмаса, нима қилиш керак? Миржалол Қосимов нега Гейнрих билан алоқаларини яхшилай олмагани бизга аён эмас-у, аммо у Сашанинг термадаги ўрнини босиши лозим бўлган форвардни кўп қидирди-ю, аммо топишнинг иложи бўлмади. Ҳозирги кунда МТЖ биргина Игорь Сергеевга суяниб қолгани барчага яхши маълум. Агар кайфияти яхши бўлса, жамоани руҳлантириш, йўқ жойдан гол топиш борасида Гейнрихга етадиган футболчи йўқ, футболимизда. Вадим Абрамов ўз вақтида Сашанинг «тилини топа» олганди. Саша ўшанда ҳам «фахрий» саналарди, ҳозир ҳам шундай. Лекин у МТЖга албатта, наф келтира олишига ҳалиям кўпчилик ишонади. Шунинг учун душанба куни Гейнрихнинг термага яна жалб қилиниши ҳақидаги хабар пайдо бўлганида, қувонмаганлардан қувонганлар сони кўпроқ бўлди.
Кейин эса шу пайтгача мураббийлар назаридан четда қолиб кетган Вагиз Галиуллиннинг номзоди ҳақида фикрлар янгради. Замонавий футболда тезкор вингерларсиз натижага эришиш мушкул экани барчага аён. Ахир Галиуллин бекорга Россия премьер-лигасида юрмагандир, деган фикрлар кўп айтилганига қарамай, Вагиз Қосимов даврида йиғинлардан ва ўйинлардан четда қолди. Ким билади дейсиз, унинг таркибга қайтарилиши қанотларни бемалол тасарруф қилиб юрган Рашидов ва Турсуновларнинг «уйғонишига» сабаб бўлса?! Юқоридаги икки футболчи борасидаги қарор МТЖда янгиланишдан кўра кўпроқ «эскиланиш»га ўхшаб кетади. Аммо ЖЧ-2018 саралашидаги илк ўйиндан кейин бизнинг аҳволимиз ҳавасга арзимаслигини инобатга олсак, янги жамоа ўзагини шакллантириш учун эса (ҳар галгидек) вақт йўқлигини назарда тутсак, Бабаян бу «эскиланиш»лар билан бир йўла икки қуённи пойламоқчи бўлаётганини тушуниб олишимиз қийин бўлмайди. Яъни, у таниш чеҳраларни ёрдамга чорлаб ҳам мухлислар кўнглини олмоқчи, ҳам терма учун «бегона» ёхуд «янги» бўлмаган бу футболчилар билан ўзи истаган натижага эришмоқчи. Агар Бабаян саралашнинг дастлабки босқичида керакли натижага эриша олса, унда янги лойиҳа ёки мақсадларни амалга ошириш учун вақт имконияти пайдо бўлади.
Бизга қолса, мураббий йиғинлар давомида нисбатан кучлироқ хориж чемпионатларида тўп сураётган аксарият ҳамюртларимизни бирма-бир кўрикка чақириб, уларнинг имкониятлари билан яқиндан танишиб олгани маъқул. Зеро, иқтидори бор мутахассис бир-икки назоратдан кейиноқ футболчи ҳақида тўлиқ тасаввур ҳосил қилиб, унинг хизматларидан келгусида ҳам фойдаланади ёхуд унинг номзодини дарҳол инкор қилади. Мураббий аслида шундай бўлиши лозим.
Қани кўрайликчи, Самвел Бабаян қайси йўлдан борар экан?! Муҳими, унинг «эски» янгиликлари биз учун хайрли келса, бўлгани.
Аббосбек, "ИнтерСПОРТ" газетаси
