Бир неча дақиқалар олдин Республика олимпиа заҳиралари коллежи кортларида “Девис Кубоги”нинг иккинчи даврасидан ўрин олган Ўзбекистон – Жанубий Корея терма жамоалари ўртасидаги дастлабки ўйин якунига етди.
Унда Чун Хёнга қарши кортга чиққан ўзбекистонлик теннисчи Фарруҳ Дўстов 4 сет натижасига кўра имкониятни бой берди. Дўстов илк сетда тай-брекларда ғалаба қозонган бўлса (7-6), қолган уч сетда рақибига ютқазиб қўйди (4-6, 3-6, 6-7). Мазкур баҳсда теннисчилар кортда 4 соату 4 дақиқа давомида ҳаракат қилишди. Бироздан сўнг ўзбекистоннинг биринчи рақамли ракетка устаси Денис Истомин Хон Сон Чан билан ўзаро ҳисоб-китоб қилиб олади. Эслатиб ўтамиз, “Спорт” телеканали Ўзбекистон ва Жанубий Корея терма жамоалари ўртасидаги “Девис Кубоги” баҳсларини жонли тарзда эфирга узатмоқда.
