Швейцария ҳуқуқ-тартибот муассасалари томонидан қўлга олиниб, АҚШга 16 июлда эсктрадиция қилинган ФИФАнинг собиқ вице-президенти Жеффри Уэбб 10 млн доллар гаров эвазига озодликка чиқарилди. Уэбб Бруклин федерал судидан 32 км масофадаги ҳудуддан ташқарига чиқиши керак эмас. Унинг ҳаракатланиши ортидан махсус электрон қурилма кузатади, деб хабар бермоқда Associated Press ахборот агентлиги.
Судда Уэбб ўзини рекет амалга ошириш ва пора олишда айбдор деб тан олмаган. Терговчиларнинг фикрича, у 24 йиллик фаолияти давомида футбол мусобақаларини трансляция қилиш ҳуқуқини бериш учун 150 млн доллар пора олган.
ФИФА раҳбариятининг бир неча аъзолари май ойи охирида коррупцияда айбланиб Цюрихда ҳибсга олинган эдилар. Бу коррупцион можаро сабабли бешинчи муддатга қайта сайланган ФИФА раҳбари Йозеф Блаттер ўз лавозимидан кетишини эълон қилган эди.
