16 июль куни Швейцария ҳуқуқ-тартибот муассасалари томонидан АҚШга экстрадиция қилинган ФИФАнинг собиқ вице-президенти Жеффри Уэбб 19 июль куни 10 млн доллар миқдоридаги гаров эвазига озодликка чиқарилганди.
Маълум бўлишича, унинг озодликка чиқарилишини таъминлаш учун 11та қимматбаҳо қўл соатлари, собиқ футбол амалдорининг рафиқаси Кендру Гэмбл-Уэбб номига расмийлаштирилган Ferrari ва Range Rover автомобиллари, Уэббнинг ўзига тегишли Mercedes-Benz автомобили, Уэбб хонимнинг бриллиант кўзли узуги, унинг бриллиант билагузуги ва бошқа тақинчоқлари, шунингдек, кўчмас мулкларнинг 10та ҳужжати ҳамда Уэбб хонимнинг ҳисоб рақамидаги 400 минг долларга яқин пул сарфланган.
Эслатиб ўтамиз, 27 май куни ФИФА тизимидаги порахўрлик ва пул ювиш билан жиноятларни фош қилиш ишлари бошлангач, биринчилардан бўлиб ФИФА вице-президенти, Шимолий ва Марказий Америка ҳамда Кариб ҳавзаси (КОНКАКАФ) конфедерацияси раҳбари Жеффри Уэбб ҳибсга олинганди. У Нью-Йоркдаги судда ўзига қўйилган айбловларни тан олмаган.
Гаров эвазига озод қилинган Уэбб Бруклин федерал судидан 32 км масофадаги ҳудуддан ташқарига чиқиши керак эмас. Унинг ҳаракатланиши ортидан махсус электрон қурилма кузатади.
