Англия премьер-лигасининг ижрочи директори Ричард Скадэморнинг маълум қилишича, янги мавсумда ЕЧЛда иштирок этадиган инглиз жамоаларига қулайлик яратиш мақсадида турнир тақвимида ўзгартиришлар амалга оширилмайди.
2007 йилдан 2011 йилгача инглиз жамоаларидан камида учтаси ЕЧЛнинг чорак финалида қатнашган (20та имкониятдан 16та ўрин). Кейинги 4 йил давомида АПЛ жамоаси ЕЧЛ чорак финалига атиги 3 марта чиқди.
"Ҳа, хавотирланса арзийди. Кўрсаткичлар ёмонлашишда давом этса, йўлланмалар сони 4тадан 3тагача тушиши мумкин. Вазиятни изоҳлаш қийин, ахир жамоаларимиз турнирда яхши натижа кўрсатиш учун тиришишмоқда.
Янги мавсум тақвимида бир қанча ўйинлар ҳафтанинг жума кунига белгиланди. Лекин биз мавсум давомида ўйинларнинг вақтини ўзгартирмоқчи эмасмиз. ЕЧЛ ўйинлари сешанба ва чоршанба кунлари ўтказилади. Бир жамоага ёрдам бериш учун лиганинг бошқа жамоаларининг манфаатларига дахл қилинмайди. Бу бўйича қарор қабул қилиб бўлинган", дейди Скадэмор.
Қайд этиш жоизки, ўтган мавсумда "Арсенал" ва "Челси" жамоалари мураббийлари Арсен Венгер ва Жозе Моуриньо АПЛ тақвими ЕЧЛдаги иштирок учун ноқулай тузилганидан шикоят қилишган эди.
