"Анжи" жамоаси Россия футбол иттифоқи ва ҳуқуқ-тартибот органларидан Россия чемпионатининг 3 тури доирасида "ЦСКА"га қарши ўтказилган ўйинда мухлисларнинг ўзини ёмон тутгани бўйича шикоят қилди.

1 август куни ўтказилган бу ўйинда "ЦСКА" 1:0 ҳисобида ғалаба қозонганди.

"1 август куни "Арена Химки"да "ЦСКА" ва "Анжи" жамоалари баҳсида мезбон жамоа мухлислари ўзларини жуда ёмон тутишди ва жиноий ҳаракатларни амалга оширишди. Мухлислар томонидан бундай ишларнинг юз бериши жазосиз қолса, улар бундай ҳаракатларини давом эттираверишади. Бу эса мамлакат футболи тараққиётига салбий таъсир кўрсатиши табиий", дейилади "Анжи" жамоаси расмий сайтида.

"Биз нафақат ўз жамоамиз ва мухлисларимизни, балки Россиядаги барча жамоалар ва мухлислар бундай маданиятсиз, ўзбошимча фанатлардан ҳимоя қилинишини истаймиз", деб қўшимча қилинади мурожаатда.