Таиланднинг Бангкок шаҳрида бокс бўйича Осиё чепмпионати ўйинлари давом этмоқда. Кундузги дастурдан ўрин олган чорак финал баҳслари якунига етди. Унда икки нафар спортчимиз рингга кўтарилди ва ғалабага эришишди.

Дастлаб 49 кг.гача бўлган вазн тоифасида Ҳасанбой Дўсматов япониялик Тсубой Томоя билан жанг олиб борди. Ҳамюртимиз рингда тўла устунликка эришди ҳамда ҳакамларнинг учаласа ғалабани Дўсматовга берди — 3:0. Шу тариқа Ҳасанбой ярим финал йўлланмасини қўлга киритди.

Ёш боксчимиз Бектемир Мелиқўзиев эса куннинг сенсацион натижаларидан бирини қайд этди. Ўсмирлар ўртасида жаҳон чемпиони, ўсмирлар ўртасидаги олимпия ўйинлари (Нанкин) ғолиби бўлган Бектемир катталар терма жамоаси сафига қўшилганига кўп бўлгани йўқ. У бугун қозоғистонлик жаҳон ва Осиё чемпиони Жанибек Алимханулининг синовидан ўтди. Қўшни юрт спортчиси тажриба, бўй ва техникада устунликка эга бўлганига қарамай, Мелиқўзиев жангни ғалабагача олиб борди. Биринчи ва иккинчи раундлар нисбатан тенг ўтди. Учинчи раундда эса ўзбек боксчиси рақибига кучли ва аниқ зарбалар йўллашга муваффақ бўлди. Натижада ҳакамларнинг икки нафари ғалабани Бектемир Мелиқўзиевга тақдим этди — 2:1.

Бугун кечки дастурда яна 3 нафар ҳамюртимиз — Муроджон Аҳмадалиев (56 кг.), Фазлиддин Ғоибназаров (64 кг.), Рустам Тўлаганов (91 кг.) чорак финал жангларини ўтказишади. Яна 4 нафар боксчимиз чорак финал жанглари учун эртага рингга кўтарилашади.