Аввал хабар қилганимиздек, шу йилнинг 18-20 сентябрь кунлари Тошкент шаҳрида Ўзбекистон – АҚШ жамоалари ўртасида Дэвис Кубоги доирасида Жаҳон босқичига саралаш баҳслари бўлиб ўтади.
Бугун пойтахтимиздаги “City Palace” меҳмонхонасида мазкур учрашувга қуръа ташланди. Унга кўра, 18 сентябрь куни Ўзбекистоннинг биринчи рақамли теннисчиси Денис Истомин Стив Жонсонга қарши кортга чиқади. Фаррух Дўстов эса Жек Сок билан куч синашади.
19 сентябрь куни жуфтликлар баҳси ўтказилади. Истомин/Дўстов дуэти Жонсон/Куэрри жуфтлигига қарши қортга тушади.
20 сентябрь куни Денис Истомин Жек Сок билан, Фаррух Дўстов эса Стив Жонсон билан баҳс юритади, деб хабар бермоқда Ўзбекистон Миллий Олимпия қўмитаси матбуот хизмати.
Маълумот учун. Мазкур учрашув Ўзбекистон терма жамоаси учун жамоавий баҳслардаги жаҳон чемпионатининг олий лигасига чиқиш учун саккизинчи уриниш бўлади. Бунга қадар мамлакатимиз ракетка усталари юқори лигага йўлланма олиш учун икки марта австралияликлар билан (1998, 2014), шунингдек, бир мартадан Чехия (1999), Голландия (2000), Сербия (2009), Испания (2001) ва Қозоғистон (2012) терма жамоаларига қарши кураш олиб боришган. Таъкидлаш жоизки, шу давр мобайнида терма жамоамиз Осиё Океания минтақасининг биринчи гуруҳида турнир жадвалини мунтазам равишда бошқариб келганлар.
