Олий лига 24-тур учрашувлари доирасидан ўрин олган “Локомотив” – “Олмалиқ” учрашувидан кейин ҳар икки жамоа устозлари иштирокида матбуот анжумани ўтказилди.
Матбуот анжуманининг иккинчи қисмида “Локомотив” устози Вадим Абрамов иштирок этди.
– Бугунги қайд этилган ҳисобдан хурсандман. Аммо жамоам намойиш этган ўйиндан кўнглим тўлгани йўқ. Биз бундан-да яхшироқ ўйнашга қодирмиз. Аммо ҳали ўзимизнинг бор кучимизни намойиш эта олмаяпмиз. Шу ўринда таъкидлаш лозимки, ўйин рақиб жамоага ҳам кўп жиҳатдан боғлиқ бўлади. Агар рақиб имкон берса, биз ҳам бор кучимиз билан ўйнай оламиз. Аммо таркибимизда Фабрегас каби ижрочилар йўқ ва ҳужумчиларимизга мукаммал паслар узатиб бериш борасида мақтана олмаймиз. Шу сабабли ҳам ҳар бир учрашув биз кутгандек ривож олаётгани йўқ, – дея айтиб ўтди Вадим Абрамов.
