Қатар пойтахти Доҳа шаҳрида бокс бўйича катталар ўртасида ўтказилаётган жаҳон чемпионатида кеча рингга кўтарилган 5 нафар боксчимиздан тўрттаси навбатдаги ғалабаларни қўлга киритиб, чорак финал йўлланмасига эга бўлдилар.

Дастлаб Муроджон Аҳмадалиев (-56 кг) ушбу вазн тоифасида биринчи рақамда сараланган қозоғистонлик Қайрат Ералиевни 3:0 ҳисобида мағлуб этди. Ушбу ғалаба қолган спортчиларимизни янада рухлантириб юборди ва ҳамюртларимиз бирин-кетин рақибларини енга бошлашди.

Жумладан, Фазлиддин Ғоибназаров (-64 кг) мезбонлар вакилини биринчи раунддаёқ накаутга учратган бўлса, Бектемир Мелиқўзиев франциялик Кристиан Ассомодан 2:1 ҳисобида устун келди. Юқори вазн тоифасида Ватанимиз шарафини ҳимоя қилаётган Рустам Тўлаганов ҳам Янги Зеландия вакили Дэвид Ниик устидан 3:0 ҳисобида ишончли ғалабани қўлга киритди. Кеча бўлиб ўтган баҳсларда фақатгина Ҳасанбой Дўстматов озарбайжонлик Руфат Гусейновга 1:2 ҳисобида имкониятни бой берди.

Шу тариқа, жаҳон чемпионатига йўл олган 9 нафар чарм қўлқоп усталаримиздан 4 нафари чорак финалга чиқишди. Бугун яна 4 нафар боксчимиз чорак финал йўлланмаси учун рингга кўтариладилар.

Хусусан, Шаҳобиддин Зоиров (-52 кг) хитойлик Ху билан, Элнур Абдураимов (-60 кг) Янги Зеландия вакили Чад Милнес билан, Элшод Расулов (-81 кг) туркиялик Карлидаг билан, Баҳодир Жалолов (+91 кг) эса Линиер Перо (Куба) билан баҳс юритадилар. Барча спортчиларимизга бўлажак баҳсларда ҳам омад ва зафарлар тилаб қоламиз.

Шавкат Жалилов