Айни пайтда барча футбол ишқибозларининг диққат ва эътиборлари Евро-2016 саралаш учрашувларига қаратилган. Ўз навбатида, бу беллашувлар ҳал қилувчи паллага кирган ва қайсидир кучли ҳамда кутилмаган жамоалар Франция яшил майдонларига чипталар буюртма беришни бошлаб юбришган. Бу яхши, албатта. Лекин терма жамоаларнинг ўйинлари клубларга қимматга тушаётгани ҳам бор гап. Масалан, юрт шарафини ҳимоя қилаётган футболчилар клубларидаги марказий ва қимматли баҳсларни ўтказиб юборишади. Масалан, кеча Испания - Люксембург қарама-қаршилигида Альваро Мората ва Давид Силва жароҳат олди. Ундан олдин эса Серхио Агуэро, Карим Бензема, Поль Погба, Давид Луиз, Марио Гётце, Бастиан Швайнштайгер ФИФА ўйинлари қурбонига айланишди.
18.10.2015
“Интер” – “Ювентус”
Ҳозирги кунда Мората “Ювентус”нинг асосий фигураларидан бири эканлигини инобатга олсак, кейинги турда “Интер”га қарши ўйинни ўтказиб юборади. Бу эса шусиз ҳам ўйинлари қовушмаётган Италиянинг амалдаги чемпиони учун катта йўқотиш бўлади.
Шунингдек, франциялик Поль Погба ҳам терма жамоа машғулотларида кичик жароҳат орттириб олгани маълум бўлди ва бир ҳафта майдонга туша олмаслиги мумкин. Миланликларга қарши учрашувга қадар тикланиши эса сўроқ остида.
24 октябрь
“Манчестер Юнайтед” – “Манчестер Сити”
Давид Силва ва Серхио Агуэро “Манчестер Сити”нинг асосий бўғинлари ҳисобланишлари ҳеч кимга сир эмас. Давид Силва ҳам кеча ватандоши Мората каби Люксембургга қарши беллашувда тўпиғини шикастлаб олган бўлса, Агуэро Эквадор билан ўйинда жароҳат олди ва 4-5 ҳафта давомида майдон ташқарисида бўлади.
Мазкур йўқотишлар шаҳарликлар учун жиддий бош оғриғи ҳисобланади. Чунки уларни олдинда “орзулар театри”да “Манчестер Юнайтед” кутиб турибди. Эътиборга молик томони, “қизил иблислар”да ҳам йўқотиш бор. Бастиан Швайнштайгер терма жамоа машғулотлари пайтида Погба каби кичик муаммога дуч келди. Аммо “манчестерлик олифталар” ушбу тўқнашувгача сафга қайтиши кутилмоқда.
21 октябрь
“ПСЖ” – “Реал Мадрид”
Мадридни шифохонага айлантириб юборган “қироллик клуби” Карим Бенземанинг Франциядаги голлари қувонтирган бўлса, терма жамоада жароҳат олиши “Реал” мутасаддиларини ҳақиқий муаммолар гирдобида қолдирди. Чунки мадридликлар чемпионлар лигасининг кейинги турида “ПСЖ” билан тўқнаш келишади. Шу боис, французнинг йўқлиги Рафаэль Бенитесга яна бир синовни тақдим этиши шубҳасиз. Аммо парижликларнинг асосий ҳимоячиси ҳисобланган Давид Луиз ҳам Чили билан беллашувда жароҳат олди. Бироқ бразилияликнинг аҳволи ҳақида аниқ маълумот йўқ. Унинг “Реал М”га қарши ўйинда иштирок этиши ноъмалум.
20 октябрь
“Арсенал” – “Бавария”
Терма жамоадаги энг катта жароҳатни Марио Гётце орттириб олди. Узун-қулоқ гапларга қараганда, германиялик ярим ҳимоячи мавсум оҳирига қадар сафдан чиққан. Бу “Бавария” учун йўқотиш эмасдир. Лекин футболчининг узоқ муддат футболдан четда қолиши унинг мухлислари учун катта “жудолик”. Энди, Марио “Арсенал” билан учрашувни томошабин сифатида кузатиб боради.
