ЖЧ-2018 саралаш босқичи доирасида Ўзбекистон ва Шимолий Корея терма жамоалари ўртасидаги ўйиндан олдинги матбуот анжуманининг иккинчи қисмида Самвел Бабаян иштирок этди.

— Эртага масъулиятли ва муҳим ўйин кутиб турибди. КХДР жадвални бошқармоқда, ҳурматга лойиқ жамоа. Биз ҳам ўйинга яхши тайёргарлик кўрдик. Эртага яхши ўйин кўрсатиб, мухлисларни хурсанд қилишга ҳаракат қиламиз.

— Асосий таркиб борасида бир қарорга келдингизми?
— Албатта, дастлабки режалар бор, аммо айрим ўзгаришлар бўлиши мумкин. Олдимизда ҳали бир сутка вақт ва битта машғулот бор. Эртага эрталаб якуний қарорга келамиз.

— Эртага жамоа неча ҳужумчи билан ўйнайди?
— Номинал жиҳатдан бир ҳужумчи билан ўйнаймиз. Ўйин давомида эса ҳар қандай футболчи ҳужум чизиғида пайдо бўлиши мумкин. Бизнинг стратегиямиз содда: 10 киши ҳимояда, 10 киши ҳужумда.

— Эртага ёмғир ёғиши кутилмоқда. Об-ҳаво жамоанинг режасини ўзгартириши мумкинми?
— Ҳар қандай вазиятга тайёрмиз. Филиппиндаги ўйин орқали ёмғирли ҳавода ўйнаш тажрибасига эгамиз.

— КХДРнинг тезкор ҳужумлари ва қарши ҳужумларига тайёрмисиз?
— Рақибни яхши ўргандик, гапларингизда жон бор. Рақиб футболчилари жонини бериб ўйнайди. Уларнинг ўйин услуби содда, аммо ўйинчилар 200%га борини бериб ўйнайди. Уларга қарши чора кўришни режалаштириб қўйганмиз.

— Одил Аҳмедов ва Виталий Денисов Россия ва Европа лигасида муҳим ўйинларда иштирок этишди. Улар эртанги ўйинга қанчалик тайёр?
— Ҳақиқатан ҳам улар 1 ой давомида 6-7та муҳим учрашувларда ўтказиб, катта куч сарфлашди. Улар профессионал. Умид қиламан, улар эртага бор кучларини бериб ҳаракат қилишади ва жамоага катта ёрдам беришади.

КХДРга қарши ўйин гуруҳдаги тақдиримизни ҳал қилувчи аҳамиятга эга бўлади. Шу боис, мухлислар стадионга ташриф буюриб, бизни қўллаб-қувватлашларини истардик.