Биласиз, бугун Олий Лигада сўнгги 30-тур учрашувлари давом эттирилди.
Кун доирасидан ўрин олган учрашувлар орасида Жиззахда кечган “Сўғдиёна” – “Бухоро” қарама-қаршилигига эътибор анча юқори эди. Зеро мазкур матчда очко ҳар икки жамоа учун ҳам сув ва ҳаводек зарур эди.
Анчагина қизиқарли кечган ўйинда бухороликлар характер намойиш эта олишди ва меҳмонда 3:2 ҳисобида ғалабага эришиб, элитада қолиш вазифасини уддалашди. “Бухоро” клуби сафида сўнгги пайтларда етакчилардан бирига айланган Максимилиан Фомин эса SPORTS.uz интернет-порталига ўйин борасидаги таассуротларини бўлишди.
- Ҳозир барчамизни жуда ажойиб ҳиссиётлар қамраб олган. Қозонилган ғалабадан бошқа ҳеч нарса ҳақида ўйлаётганимиз йўқ. Биз элитада қолиш вазифасини уддалай олдик. Бундан жуда ҳам хурсандмиз. Бизга охиригача ишонч билдирган барча-барчага миннатдорчилик билдирамиз. Жамоамизнинг кўп сонли мухлислари ва ҳокимимиз Эсонов Муҳиддин Турдиевич бизни сўнгги сонияларгача қўллаб-қувватлашди. Бунинг учун уларга катта раҳмат. Бухоро шаҳри аҳлига шундай ажойиб ғалабани тортиқ қила олганимиздан шодмиз. Ҳаммани ғалаба билан табриклайман, - дейди ёш истеъдод эгаси.
