Бошқа жамоалар қаторида “Андижон” футболчилари ҳам қишки таътилда хордиқ чиқаришмоқда. Қишки таътил бўлгани боис мавсум якунларини сарҳисоб қилиб ўтсак.
Жорий йилги чемпионатни андижонликлар мусобақа жадвалида 13-ўринда якунлашди. Жамоа 30 учрашувда 8 марта ғалаба қозониб, 4 бор дуранг ўйнади ва 18 ўйинда имкониятни бой берди. Чемпионат давомида “Андижон” таркибида 27 нафар футболчи майдонга тушди. Уларнинг орасида энг кўп учрашувни Жавлон Гусейнов ўтказди. Бу ҳимоячи олий лига баҳсларида 29 марта майдонга тушди. Ана шу беллашувларда Гусейнов уч бор сариқ карточка олди. Ундан кейинги ўринларда Геннадий Мошняга, Даврон Турсунов ва Абдумалик Абдуллаев 28 та ўйинда тўп сурдилар. Иккинчи даврада таркибга қўшилган тажрибали ҳужумчи Анвар Бердиев жамоанинг энг яхши тўпурари бўлди. У чемпионат баҳсларида 11 учрашувда майдонга тушиб, рақиблар дарвозасини 7 бор ишғол этди. Иброҳим Отахонов эса мавсум мобайнида ҳакамлар томонидан энг кўп жазоланган футболчи бўлди. У 11 та сариқ ва битта қизил карточкани ўз ҳисобига ёзиб қўйди. Санжар Асқаралиев эса ҳакамлар томонидан 8 бор огоҳлантирилди.
Бундан ташқари Фарҳод Бекмуродов, Турсунбой Хусанов ва Фарруҳ Мирзаев бу йил олий лигада ўз дебютларини ўтказишди.