Осиё футбол конфедерацияси президенти, ФИФА президентлиги учун сайловда номзод ҳисобланган шайх Салмон ибн Иброҳим Ал-Халифа 26 февраль кунига белгиланган сайловда ғолиб чиқса, 2018 ва 2022 йилги футбол бўйича жаҳон чемпионатлари мезбонлиги учун қайта сайлов ўтказиш бўйича талабномани кўриб чиқиши мумкин. Бу ҳақда insidethegames хабар берган.
У агар Россия ва Қатарнинг мундиал мезбонига айланишида жиддий қоида бузилиши рўй бергани аниқланадиган бўлса, айнан шундай қадам ташлашини билдирган.
Эслатиб ўтамиз, айни вақтда ФИФА бош қароргоҳи жойлашган мамлакат ҳисобланмиш Швейцария полицияси бу икки мундиал мезбонлиги нақадар шаффоф йўл билан қўлга киритилганини текширмоқда.
ФИФА президентлиги учун сайловда Ал-Халифадан ташқари, иорданиялик шаҳзода Али ибн ал-Ҳусайн, жанубий африкалик миллиардер, собиқ вазир Токио Сексевале, ФИФА бош котибининг собиқ ўринбосари Жером Шампан ва УЕФА бош котиби Жанни Инфантино иштирок этади.