Россиянинг "Ростов" жамоасининг эронлик ҳужумчиси Сердар Азмун ўз жамоасининг Бирлашган Араб Амирликларидаги машғулот йиғинида иштирок эта олмайдиган бўлди. БАА бу футболчига сиёсий сабаб туфайли ўз ҳудудига кириши учун виза бермади. Бу ҳақда "Ростов"нинг расмий сайтида маълум қилинган.
"Эрон ва Саудия Арабистони муносабатларининг узилиши ортидан БАА ҳам эронликлар билан алоқалари даражасини камайтиргани туфайли "Ростов" жамоасининг эронлик ҳужумчиси Сердар Азмун бу мамлакатга кириш визасини ола олмади ва у жамоанинг биринчи машғулот йиғинида иштирок эта олмади. Жамоа бу муаммони ҳал қилиш учун барча чорани кўради", дейилади хабарда.
Энди Азмун Россия чемпионатининг иккинчи даврасига мураббийлар штаби кўрсатмаси бўйича мустақил равишда тайёрланади. "Ростов"нинг БААдаги йиғини 10 январь куни бошланганди.
Маълумот учун, 21 ёшли ҳужумчи Сердар Азмун жорий чемпионатининг 13 ўйинида иштирок этди ва 3та гол урди.
