Мадриднинг “Реал” клуби Дортмунднинг “Боруссия” жамоаси марказий ҳимоячиси Нико Шлоттербекни сотиб олишга яқин турибди. Бу ҳақда АС нашри хабар берди.

Қайд этилишича, “қаймоқранглилар” учун ҳимоя марказини кучайтириш ёзги трансфер ойнасидаги устувор вазифа ҳисобланади. Манбанинг маълумотига кўра, германиялик футболчи “асаларилар” билан шартномани узайтиришни рад этган, шу сабабли клуб уни келаётган ёзда сотиб юборишни режалаштирмоқда.

Сўнгги ҳафталарда “Реал” 26 ёшли ҳимоячини фаол кузата бошлади. “Қироллик клуби” Шлоттербекнинг “Боруссия” ўйинидаги ҳиссаси ва Германия терма жамоасининг асосий футболчиси сифатидаги мақомини юқори баҳоламоқда. Таъкидланишича, ҳимоячининг Мадридга ўтишига ижобий таъсир кўрсатиши мумкин бўлган асосий омиллардан бири — икки клуб раҳбарияти ўртасидаги илиқ муносабатлардир.

“Боруссия” Шлоттербекни тахминан 50 миллион еврога баҳоламоқда. Маълумот учун, германиялик ҳимоячи жорий мавсумда дортмундликлар сафида 26 та учрашувда майдонга тушиб, 3 та гол ва 2 та голли узатмани амалга оширди. Transfermarkt портали футболчининг бозор қийматини 55 миллион евро этиб белгилаган.