Madridning “Real” klubi Dortmundning “Borussiya” jamoasi markaziy himoyachisi Niko Shlotterbekni sotib olishga yaqin turibdi. Bu haqda AS nashri xabar berdi.

Qayd etilishicha, “qaymoqranglilar” uchun himoya markazini kuchaytirish yozgi transfer oynasidagi ustuvor vazifa hisoblanadi. Manbaning ma’lumotiga ko‘ra, germaniyalik futbolchi “asalarilar” bilan shartnomani uzaytirishni rad etgan, shu sababli klub uni kelayotgan yozda sotib yuborishni rejalashtirmoqda.

So‘nggi haftalarda “Real” 26 yoshli himoyachini faol kuzata boshladi. “Qirollik klubi” Shlotterbekning “Borussiya” o‘yinidagi hissasi va Germaniya terma jamoasining asosiy futbolchisi sifatidagi maqomini yuqori baholamoqda. Ta’kidlanishicha, himoyachining Madridga o‘tishiga ijobiy ta’sir ko‘rsatishi mumkin bo‘lgan asosiy omillardan biri — ikki klub rahbariyati o‘rtasidagi iliq munosabatlardir.

“Borussiya” Shlotterbekni taxminan 50 million yevroga baholamoqda. Ma’lumot uchun, germaniyalik himoyachi joriy mavsumda dortmundliklar safida 26 ta uchrashuvda maydonga tushib, 3 ta gol va 2 ta golli uzatmani amalga oshirdi. Transfermarkt portali futbolchining bozor qiymatini 55 million yevro etib belgilagan.