2006 йилги ЖЧ таклиф қўмитасига раҳбарлик қилган Франц Беккенбауэрга ҳамда ФИФАнинг бир қанча вакилларига нисбатан Немис футбол иттифоқи (DFB) томонидан иш очилди.
"DFB Германиянинг 2006 йилги жаҳон чемпионатига мезбонликни қўлга киритишида коррупцияга йўл қўйилгани билан боғлиқ можаролар бошланишидан қочишга уринмоқда. Шу туфайли, бу борада турли шубҳалар пайдо бўлгач, ўша мезбонлик қўлга киритилишида иштирок этган шахслар текширилиб, агар ҳақиқатда ҳам жиноятга йўл қўйилга бўлса, бунда бутун федерация эмас, баъзи бўлимлар жазоланишига эришишни истамоқда", дейилади ESPN нашрида.
Маълум қилинишича, 2006 йилги ЖЧ сайловларида овозларни сотиб олишда гумон қилинаётган Беккенбауэрнинг иши тергов комиссиясидан ФИФА ахлоқ қўмитасининг арбитраж комиссиясига тақдим этилган.
Бундан олдинроқ, Германиянинг 2006 йилги ЖЧ мезбонлигини қўлга киритишдаги ички текширувлари натижалари 2016 йилнинг 4 мартида оммага эълон қилиниши ҳақида хабар берилганди.