Айни дамда пойтахтимизда ўтаётган футзал бўйича Осиё чемпионати баҳслари айни қизғин палласига кирди.

Кеча "А" гуруҳи 3-турида Ўзбекистон терма жамоаси Ливан футзалчиларига қарши баҳс олиб борди ва 2:0 ҳисобида зафар қучди. Бу орқали эса терма жамоамиз чорак финалга гуруҳ босқичидан 3та ғалаба билан чиқди.

Терма жамоамиз сардори Артур Юнусов эса Ливанга қарши кечган матч борасидаги фикрларини билдириб ўтди.

"Учрашув осон ўтгани йўқ. Ливанлик футзалчиларга 3-турда фақат ва фақат ғалаба керак эди. Шу боисдан улар ўйин аввалиданоқ олдинга ўтишди. Бизнинг эса гуруҳдан чиққанимиз олдиндан маълум эди. Шундай бўлса ҳам биз мухлисларимизни хушнуд этишни мақсад қилгандик.

Якунда кучли рақиб устидан ғалаба қозона олганимиздан шодмиз. Биз гуруҳдан юз фоизлик натижа билан чиқдик. Ўйлашимча, қайд этган натижамиздан барча хурсанд бўлди. Энди олдинда бизни янада масъулиятлироқ ўйинлар кутмоқда.

Ироқ билан бўладиган ўйин ҳақида ҳозирча бирор тайинли гап айта олмайман. Чунки ҳали бу ўйингача бироз вақт бор. Биз эса унгача тикланиш жараёнини олиб борамиз. Сабаби таркибда бир нечта футзалчиларимиз шамоллаб қолишди. Аммо Ироқ билан бўладиган ўйингача ҳамманинг яна формага қайтиб олишига ишонаман. Насиб этса, чорак финал учрашувига ҳам яхши тайёргарлик олиб борамиз", — дейди маҳоратли футзалчи SPORTS.uz интернет-портали мухбирига.