“Ал-Наср” – “Бунёдкор” учрашуви олдидан ташкил этилган матбуот анжуманининг иккинчи қисмида саудияликлар устози Рене Игита ва жамоа сардори Хусайн Абдулғани иштирок этди.

- Осиё Чемпионлар лигаси тамомила бошқача мусобақа. Биз айни пайтда унинг стартида турибмиз. Шундай экан, ички чемпионатда бой берган натижаларимизни қитъа миқиёсидаги мусобақада қайтармоқчимиз. Турнирни яхши кайфиятда бошлаб олсак, унинг қолган қисмини ҳам шундай давом эттирамиз. “Ал-Наср”нинг имкониятларидан келиб чиқиб айтаманки, биз турнир давомида ўзига хос рақобат олиб киришга қодирмиз. Шунингдек, Чемпионлар лигасида яхши натижа қила оламиз. Ҳозирча жамоани вақтинча бошқариб турибман. Янги бош мураббий – Рауль Канеда кеча клуб қароргоҳига етиб келди. Гарчи у аввал ҳам “Ал-Наср”да фаолият юритиб кетган бўлса-да, ҳозирча жамоа билан бошқаттан танишмоқда. Лекин “Бунёдкор”га қарши баҳсда унинг кўрсатмаларига қулоқ тутамиз. Ўйлайманки, мураббийлар билан келишиб иш тутсак, рақибни енга оламиз, - дейди колумбиялик машҳур собиқ дарвозабон Рене Игита.

- “Бунёдкор” билан аввалги мавсумда ҳам ўйнаганмиз. Биз ҳам, улар ҳам бир-биримизни яхши биламиз. Ўйлашимча, олдинда қизиқарли баҳс кутиб турибди. Ким кучли эканлигини учрашув кўрсатиб беради, - “Ал-Наср” сардори Хусайн Абдулғани.