“Навбаҳор” – “Қўқон-1912” жамоалари ўртасидаги учрашув якунига етгач, ҳар икки жамоа мураббийлари иштирокида матбуот анжумани бўлиб ўтди. Дастлаб қўқонликлар устози Мурод Исмоилов журналистларнинг саволларига жавоб қайтарди:

- Биринчи навбатда кўпчилик жамоамизни кубок ўйини бўлганлиги сабабли ушбу мусобақага эътибор қаратишмаяпти деган фикрларни билдиришганди. Хусусан, “НБУ-Осиё” қарши дастлабки босқичда кўпроқ ёшларга эътибор қаратганимиз сабабли жамоага кубокни аҳамияти йўқ деган нотўғри фикрлар юзага келганди. Лекин, амалда бундай эмас, “Қўқон-1912” жамоаси учун ҳар қандай ўйинни аҳамияти юқори. Ҳар бир рақибни ҳурмат қилган ҳолда учрашувни қай тарзда ўтишидан келиб чиққан ҳолда тайёргарлик кўрамиз.

“Навбаҳор” кучли жамоа бўлганлиги сабабли ўзгача иштиёқ билан ҳозирлик кўргандик. Ўйлаган режаларимиз учрашувда амалга ошди. Йигитларни бор кучлари билан ҳаракат қилишлари менга манзур бўлди. Футболчиларимиз майдонда кўп меҳнат қилишди. Кимгадир ҳимоявий ўйин кўрсатганлигимиз ёқмаган бўлиши мумкин. Қандай ҳолат бўлишидан қатъи назар йигитлар олдиларига қўйилган вазифани бажаришди. “Навбаҳор” жамоасида ҳам гол уриш учун кўплаб хавфли вазиятлар юзага келди. Дарвозабонимиз пенальтини ҳам қайтаришга муваффақ бўлди. Умуман олганда омад биз томонда бўлди деб ўйлайман.