"Лестер" Англия чемпионлиги сари яна бир жиддий қадам ташлади. 32-тур доирасида "Тоттенхэм"нинг очко йўқотганидан фойдаланган "тулкилар", бугун ўз майдонларида "Саутгемптон"ни мағлуб этиб, очколар орасидаги фарқни оширди.

Куман шогирдлари ушбу ўйинда ижобий натижага эришишлари мумкин эди. Баҳснинг 32-дақиқасида Садио Мане яккама-якка вазиятга чиқиб кетди ва Шмейхелни алдаб ўтиб, зарба берди. Тўп эса ортдан етиб келган Симпсонга тегиб қайтди. Орадан 6 дақиқа ўтиб эса мезбонлар ҳисобни очишди. Дринкуотер чап қанотдан берган узатмани Морган бош билан дарвозага жойлаб қўйди.

Иккинчи бўлимда тўп назорати асосан "Саутгемптон" томонида бўлди. Улар қанотлардан ҳужум ташкил қилишди. Майдон эгалари рақибнинг барча хамлаларини бартараф этишга муваффақ бўлишди. "Лестер"нинг қарши ҳужумлари эса жуда хавфли бўлди. Меҳмонлар дарвозабони Форстер 3 марта ўта хавфли зарбаларни бартараф этди.

Шу тариқа, Раньер шогирдлари кетма-кет бешинчи ўйинда 1:0 ҳисобида ғалаба қозонишди. Чемпионат тугашига 6та тур қолганида "Лестер" "Тоттенхэм"ни 7, "Арсенал"ни 8 очкога ортда қолдирмоқда.

АПЛ, 32-тур
Лестер – Саутгемптон 1:0 (1:0, 0:0)
Гол: 1:0 – 38 Морган.
Лестер – Шмейхель, Морган, Фукс, Симпсон, Хут, Канте, Дринкуотер, Олбрайтон (Дайер, 90), Марез (Грэй, 79), Варди, Окадзаки (Ульоа, 64).
Саутгемптон – Форстер, Фонте, ван Дейк, Бертран, Таргетт (Тадич, 46), Ваньяма, Класи (Остин, 73), Мане, Дэвис (Уорд-Проуз, 73), Соареш, Пелле.
Огоҳлантиришлар: Ваньяма (46), Дринкуотер (51), Тадич (75), Фукс (88).