Қўқон истеъдодлар макони, дейиш мумкин. Шу кунга қадар бу ердан кўплаб футбол юлдузлари етишиб чиққан, бундан кейин ҳам етишиб чиқса ажаб эмас.

Негаки, “Қўқон-1912” жамоаси сафида бир қатор ёш футболчилар тўп суришмоқда ва уларни Қўқон футболининг эртанги куни деб эътироф этишмоқда.

Мана шундай келажаги порлоқ ўйинчилардан бири – Иқбол Маликжоновдир. Ёшлар лигасидаги ажойиб ўйинлари орқали мухлислар меҳрини қозонган ёш ярим ҳимоячи ўз устида ишлашдан тўхтамади. Натижада “Қўқон-1912” жамоаси асосий таркиби билан машғулот ўтказа бошлади.

2 апрель санаси Иқбол Маликжонов ҳаётида учмас из қолдирди, десак муболаға бўлмайди.  “Андижон”га қарши кечган баҳсда ёш футболчимиз Олий лигадаги дебют учрашувини ўтказди. Ўйин якунланишига 10 дақиқа қолганида Носир Отақўзиев ўрнига майдонга тушган Маликжонов жамоамизда ўз дебютини нишонлаган навбатдаги футболчи сифатида тарихдан ўрин олди.  Айтиш жоизки, унинг дебюти омадли келди. Вакилларимиз дербида “Андижон”ни доғда қолдиришга эришишди. Ёш футболчимиз ушбу ғалабага ўз ҳиссасини қўшди.