Осиё Чемпионлар лигасининг 4-турида Тошкентнинг “Пахтакор” клуби сафарда “Тракторсозий” жамоасига 2:0 ҳисобида имкониятни бой берди. Биз ўз анъанамизга содиқ қолган ҳолда ўйинга оид бир қатор фактларни эътиборингизга хавола этамиз.

1. “Пахтакор” мусобақадаги 85-учрашувини ўтказиб, 32-мағлубиятини қабул қилиб олди.

2. “Шерлар” ушбу турнирда 37 та ғалаба ва 16 та дуранг ҳам қайд этишган. Тўплар нисбати — 117:113.

3. Тошкентликлар сафардаги 42-ўйинда иштирок этиб, 22-марта имкониятни бой беришди.

4. “Пахтакор” сафардаги баҳсларда 11 ғалаба ва 9 дурангга эришган. Тўплар нисбати — 45:72.

5. “Пахтакор” Эрон клубларига қарши Чемпионлар лигасидаги 15-учрашувини ўтказди. Тошкентликлар ана шу ўйинларнинг 10 тасида ғалаба қозониб, 4 тасида имкониятни бой берган. Яна бир беллашувда эса дуранг натижаси қайд этилган. Тўплар нисбати — 22:15, “Пахтакор” фойдасига.

6. “Шерлар” Эронда 7 та ўйин ўтказиб, 2 ғалаба, 1 дуранг ва 4 мағлубият қайд этишган.

7. “Тракторсозий” ОЧЛда ўзбек жамоалари билан ўтказган 4-учрашувида илк бор ғалаба қозонди. Клуб бундан олдинги 3 та баҳсни ҳам бой берган эди.

8. “Тракторсозий” турнирдаги 22-учрашувида 6-ғалабасига эришди.

9. Эрон жамоаси ушбу турнирда 3 марта иштирок этиб, барчасида гуруҳда сўнги ўринни эгаллаган эди. Бу сафар жамоа ўз тарихида илк бора гуруҳдан чиқиш учун ажойиб имкониятга эга.

10. “Пахтакор” “Тракторсозий” жамоаси майдонида ютқазган биринчи Ўзбекистон жамоасига айланди. Бундан олдин мазкур стадионда Қаршининг “Насаф” жамоаси меҳмон бўлган ва “Қирол Артур"нинг “дубл”и эвазига 2:1 ҳисобида зафар қучган эди.

11. “Шерлар” турнирда ўтказган 85 ўйиннинг 21 тасида рақиб дарвозасига йўл топа олишмаган.

12. “Тракторсозий” мусобақада олтинчи марта ўз дарвозаси дахлсизлигини сақлаб қолди.

Фурқат Юсупов тайёрлади.