"Барселона" Ла лиганинг кетма-кет иккинчи ўйинида мағлуб бўлмоқда. 2007 йилдан бери "Аноета" стадионида ғалаба қозона олмай келаётган "кўк-анорранглилар", бу сафар ҳам "Реал Сосьедад" майдонидан қуруқ қўл билан қайтадиган бўлишди.

Учрашувнинг 2-дақиқасидаёқ мезбон ҳимоячиларининг хатосидан сўнг Мунир дарвозабон билан юзма-юз ҳолатда қолди, аммо унинг зарбасини посбон Херонимо Рульи қайтарди. Олдинга ўтиб шуни таъкидлаш керакки, бу вазиятда мазкур дарвозабоннинг ўйинда охирги қаҳрамонлиги эмасди.

Орадан 3 дақиқа ўтиб, учрашувнинг 5-дақиқасида ўнг қанотдан етказилган узатмага Микель Ойарсабаль бош билан зарба берди. Зарба Браво учун қайтариб бўлмас траектория орқали тўрга бориб тушди.

Шундан сўнг сан-себастьянликлар 11 киши бўлиб зич ҳимоя қўрғонини юзага келтиришди. Ушбу қўрғоннинг энг сўнгида Рульи исмли посбон дарвозани "бетон"лаб ташлади. У Месси томонидан берилган бир нечта зарбани, Турон ва Иньесталарнинг хавфли зарбаларини қайтаришга муваффақ бўлди.

Ушбу мағлубиятдан кейин "Атлетико" ва "Реал" "Барса"дан атиги 3 ва 4 очко ортда қолишмоқда. Чемпионат тугашига 6 тур қолганида Ла лигада интрига кескин ошиб кетди.

Ла лига, 32-тур
Реал Сосьедад – Барселона 1:0 (1:0, 0:0)
Гол: 1:0 – 5 Ойарсабаль.
Реал Сосьедад – Рульи, де ла Белья, Рейес, Гонсалес, Элустондо (Сальдуа, 76), Ойарсабаль (Литри, 88), Прието, Сурутуса (Пардо, 80), Гранеро, Вела, Ильярраменди.
Барселона – Браво, Мунир, Пике, Дани Алвес, Рафинья (Иньеста, 46), Маскерано, Туран (Альба, 59), Сержи Роберто (Ракитич, 70), Бускетс, Неймар, Месси.
Огоҳлантиришлар: Ильярраменди (25), Туран (43), Маскерано (68), Пике (90).