"Локомотив" Осиё чемпионлари лигасининг ушбу мавсумидаги мағлубиятсиз ўйинлар сериясини давом эттирмоқда. Микляев шогирдлари 5-тур доирасида БААда "Ан-Наср" меҳмони бўлди. Мураккаб кечган ўйин 1:1 ҳисобидаги дуранг билан якунланди.

Ўйиндаги ҳар иккала гол биринчи бўлимда киритилди. Дастлаб 31-дақиқада Жирес Кембо Экоко олис масофадан кучли зарба билан Нестеров дарвозасини ишғол қилди. Биринчи бўлим тугаши арафасида бурчакдан етказилган узатмани Темурхўжа Абдухолиқов бош билан ҳисобни тенглаштирди.

Ушбу ўйинда ёқимсиз ҳолат қайд этилди. Ислом Тўхтахўжаев тўқнашувда жароҳат олиб, бурнини синдириб олди. У дарҳол БААдаги маҳаллий шифохоналарда бирига олиб кетилди.

Иккинчи бўлимда "Локомотив" кўпроқ ҳужум қилган бўлса-да, ҳисоб ўзгармади. Ушбу дурангдан кейин "темирйўлчилар" ўз очколарини 9тага етказди ва гуру пешқадамлигини сақлаб қолди. Тошкент вақти билан 21:00да бошланадиган "Ал-Иттиҳод" ва "Сепоҳон" жамоалар ўртасидаги баҳсда саудияликлар ғалаба қозона олишмаса, "Локомотив" бугуноқ плей-офф йўлланмасини ҳал қилади.

ОЧЛ, "А" ГУРУҲИ, 5-ТУР
"АН-НАСР" - "ЛОКОМОТИВ" - 1:1 (1:1)
ГОЛЛАР: Жирес Кембо Экоко (31) — Темурхўжа Абдухолиқов (43)
"Ан-Наср": 12.Шамбиҳ, 4.Жалол, 5.Аҳмад, 6.Хамис, 7.Нилмар, 8.Кембо Экоко, 10.Хименес (С), 11.Питройпа, 16.Муборак, 18.Ал-Яссий, 20.Сулаймон
"Локомотив": 1.Игнатий Нестеров, 8.Сервер Жепаров, 10.Марат Бикмаев 11.Темурхўжа Абдухолиқов, 15.Сардор Мирзаев, 17.Салим Мустафоев, 18.Тимур Кападзе, 20.Ислом Тўхтахўжаев, 22.Санжар Шоаҳмедов, 33.Олег Зотеев, 37.Шерзод Файзиев
Бош ҳакам: Лью Квок Ман (Гонконг)