"Барселона" Ла лиганинг кетма-кет иккинчи ўйинида ўта йирик ҳисобда ғалаба қозонган бўлса, жамоа ҳужумчиси Луис Суарес кетма-кет иккинчи баҳсда "покер"ни расмийлаштирмоқда.

"Спортинг"га қарши ўйинда каталонияликлар тезкор гол уришди. Ракитич юқоридан узатма берди ва дарвозабон тўпни уриб юборди. Месси бош билан бўш қолган дарвозани ишғол қилди. Мезбонлар ҳисобни очиб олганларига қарамай, танаффусга қадар майдон бўйлаб секин ҳаракатланишди. Натижада хихонликлар 3 марта гол уриш имкониятига эга бўлишди. Фақатгина омад туфайли тўп "Барса" дарвозасидан ўрин олмади.

Иккинчи бўлимда "кўк-анорранглилар" тезликни оширишди. 63-дақиқада Месси-Иньеста-Суарес комбинациясидан кейин уругвайлик футболчи дарвозани ишғол қилди. Кейинги дақиқаларда ҳакам "Спортинг" дарвозасига кетма-кет 3та пенальти белгилади. Клос Гомеснинг иккита пенальти борасида қарори баҳслашишга арзийди. Пенальтиларнинг иккитасини Суарес, биттасини Неймар аниқ амалга оширди. Ўйин сўнгида Луис Суарес рақиб дарвозасига яна бир марта йўл топди ва "покер"ни расмийлаштирди. 6:0.

Суареснинг Ла лиганинг ушбу мавсумидаги голлари сони 34тага етди ва у Роналдудан 3та голга ўтиб кетди. "Барселона" эса очколарини 82тага етказиб, 1-ўринга қайтди.

Барселона – Спортинг Хихон 6:0 (1:0)
Голлар: 1:0 – 12 Месси, 2:0 – 63 Суарес, 3:0 – 74, пенальти Суарес, 4:0 – 77, пенальти Суарес, 5:0 – 85, пенальти Неймар, 6:0 – 88 Суарес.
Барселона – Браво, Суарес, Пике (Бартра, 66), Альба, Маскерано, Сержи Роберто (Дани Алвес, 46), Ракитич (Туран, 75), Бускетс, Иньеста, Неймар, Месси.
Спортинг Хихон – Куэльяр, Лихновски, Эрнандес Родригес, Враньеш, Менендес, Халилович, Лопес (Канелья, 70), Маскарель, Аит-Атман, Перес (Санабрия, 62), Герреро (Кастро, 75).
Огоҳлантиришлар: Враньеш (26), Эрнандес Родригес (71), Халилович (84).
Четлатиш: Враньеш (84).