Эртак ҳақиқатга айланди! "Лестер" — Англия чемпиони! "Тулкилар" чемпионликни қўлга киритишди!

"Тоттенхэм" осонликча таслим бўлмоқчи эмас эди. "Шпорлар" Англия чемпионлиги учун охиригача курашмоқчи эдилар. Аммо, лекин, бироқ...

"Стемфорд Бриж"да ўтган ўйинда "Челси"га қарши ўйинда меҳмонлар фақат ғалаба учун тўп суришди. "Аристократлар" биринчи бўлимда қарши ҳужумлардан фойдаланишга ҳаракат қилишди. Ҳисобни очиш учун жуда қулай вазият 27-дақиқада юзага келди. Диего Костадан келган тўпга Фабрегас 13 метрлардан зарба берди, аммо тўп устун ёнидан ўтиб кетди.

Меҳмонлар эса ўз имкониятларини кўкка совуришмади. Ламела аниқ узатма билан Кейнни бирга бир вазиятга чиқарди. Ҳужумчи жарима майдончаси ичида Беговични алдаб ўтиб, бўш қолган дарвозага тўпни жойлади!

Биринчи бўлим тугаши арафасида ҳисобдаги фарқ яна биттага ошди. Ивановичнинг хатосидан кейин Эриксен тўпни эгаллади ва Сон Хеунг Минни бирга-бир вазиятга чиқариб юборди. КЕореялик футболчи имкониятдан самарали фойдаланди. 0:2.

Кеча "Манчестер Юнайтед" "Лестер"нинг чемпионлигини кечиктир бўлса, бугун Почеттино жамоаси Премьер-лигада чемпион жамоа номи муддатидан аввал аниқланишига йўл қўймайдигандек кўринганди.

"Челси" футболчилари Англиянинг ушбу мавсумдаги чемпиони Лондон жамоаси бўлишини истамасликларини айтишганди. Улар ўз ваъдаларининг устидан чиқишди.

Учрашувнинг 58-дақиқасида бурчакдан етказилган узатмани Кэхилл 11 метрли нуқта устидан қабул қилди ва чап оёқда кучли зарба билан дарвозани ишғол қилди. Ўйиннинг асосий вақти тугашига 7 дақиқа қолганида Азар "шпорлар"ни "музлатиб" қўйди. Диего Костадан узатма қабул қилган Эден 14 метрлардан зарба бериб, "тўққизлик"ни аниқ нишонга олди!

Ўйин жуда асабий ўтди. Аммо омад "Тоттенхэм"дан юз ўгириб, "Лестер" томон кулиб боқди! Клаудио Раньери шогирдлари мавсумнинг ҳақиқий қаҳрамонига айланишди ва ўз тарихларида илк марта Англия чемпионлигини қўлга киритишди! Табриклар!

АПЛ, 36-ТУР,
"ЧЕЛСИ" - "ТОТТЕНХЭМ" 2:2 (0:2, 2:0) (ОНЛАЙН ТРАНСЛЯЦИЯ)
Голлар: 0:1 – 35 Кейн, 0:2 – 44 Сон Хеунг Мин, 1:2 – 58 Кэйхилл, 2:2 – 83 Азар.
Челси – Бегович, Кэйхилл, Аспиликуэта, Иванович, Терри, Оби Микел, Матич (Оскар, 78), Фабрегас, Виллиан, Педро (Азар, 46), Диего Коста.
Тоттенхэм – Льорис, Вертонген, Алдервейрелд (Шадли, 90), Роуз (Дэвис, 82), Дайер, Ламела, Дембеле, Эриксен, Уокер, Сон Хеунг Мин (Мэйсон, 65), Кейн.
Огоҳлантиришлар: Уокер (27), Вертонген (38), Виллиан (45), Роуз (45), Ламела (51), Эриксен (70), Иванович (71), Оби Микел (87), Дайер (87), Дембеле (90), Кейн (90), Мэйсон (90).