Тошкент минтақаси бўйича иккинчи лига баҳсларига старт берилгани ҳақида хабар бергандик. Бу йил иккинчи лигада жами 32та жамоа иштирок этмоқда. Жамоалар 8тадан тўртта гуруҳга бўлинишган. Ҳар бир гуруҳдан иккитадан жамоа (биринчи-иккинчи ўринлар) кейинги босқичга чиқади ва ғолиблик учун кураш олиб боришади.
“Локомотив” футбол мактаби тарбияланувчилари иккинчи лига баҳсларида иккита ёш тоифасида иштирок этишмоқда. 1998 йилда туғилган тарбияланувчиларимиз (бош мураббий – Юрий Винтовкин) “Локомотив-1″ бўлиб, “В” гуруҳида қатнашяпти. 1999 йилда туғилган футболчиларимиз эса (бош мураббий – Ринат Мифтахутдинов) “Локомотив-2″ номи билан “С” гуруҳида баҳс олиб боришмоқда.
Ҳар иккала жамоамиз кеча 3-тур ўйинларида майдонга тушишди. Юрий Винтовкин шогирдлари “Олмазор” клубини йирик 8:2 ҳисобида мағлуб этган бўлса, Ринат Мифтахутдинов бошчилигидаги “Локомотив-2″ рақиби “Челано″ устидан кичик 1:0 ҳисобда устун келди.
Айни дамда “Локомотив-1″ уч учрашувдан 6 очко жамғарган ҳолда “Б” гуруҳида иккинчи ўринда бормоқда. “Локомотив-2” ҳам уч учрашувда 6 очко жамғариб “С” гуруҳида “Бунёдкор” билан қўшҳокимлик қилмоқда.
Навбатдаги турда “Локомотив-1″ – “Бунёдкор-А” ва “Локомотив-2″ – “СКИФ” ўзаро майдонга тушадилар.
Иккинчи лига. 3-тур
“Локомотив-1″ – “Олмазор” 8:2
“Локомотив-2″ – “Челано″ 1:0
