«Барселона» ҳужумчиси Луис Суарес «Гранада»га қарши бўладиган мавсумнинг ҳал қилувчи ўйини арафасида ўз фикрлари билан ўртоқлашди.

«Асосий вазифа — дарвозамизни голдан сақлаш. Ҳужумда эса биздан нима талаб этилишини биламиз.

Агар чемпионликни қўлга киритмасак, мавсумнинг энг яхши тўпурари унвонини олишдан маъно йўқ. Олдимизда жамоавий вазифа турибди.

Менга пенальти тепиш имконияти берган Мессининг ишорасини қадрлайман. Аммо мен нафақат Леога, балки Неймар, Иньеста ва бошқа жамоадошларимга миннатдорчилик билдираман. Такрорлайман, агар чемпионатда ғолиб чиқмасак, мен учун энг яхши тўпурар унвонидан маъно йўқ.

«Реал» «Гранада»ни бизга қарши ўйинда молиявий томонлама рағбатлантириши ҳақидаги гап-сўзлар? Мен бундай нарсаларга ишонмайман. Ўйлайманки, «Гранада» шахсий ғурур орқали ғалаба учун ўйнайди, худди биз чемпионликни қўлга киритиш учун интилганимиз каби. Футболчилар ўз ғурурлари учун интилишади, пул учун эмас.

Менинг келажагим? Фаолиятимни «Барселона»да якунлашни истардим. Ахир мен ҳамиша ушбу клубда ўйнашни орзу қилганман, аммо футболда олдиндан бирор нарса дейиш қийин», – дейди Суарес.