Испаниянинг «Барселона» клуби ҳужумчиси Луис Суарес Ла Лиганинг 2015/16 йилги мавсуми якунига кўра 40 та гол киритишга муваффақ бўлди. Бунинг учун уругвайлик футболчига 35 та беллашув кифоя қилди.

Ла Лига тарихида битта мавсумда 40 та ва ундан ортиқ гол уриш фақатгина иккита футболчига — Лионель Месси ва Криштиану Роналдуга насиб қилганди. Аҳамиятли томони, ҳар икки футболчи бундай муваффақиятга 3 мартадан эришган.

«Чемпионат» маълумотига кўра, Лионель Месси 2011/12 йилги мавсумда 50 та гол уришга муваффақ бўлган. Бу кўрсаткич 2012/13 йилги мавсумда 46 тани, 2014/15 йилги чемпионатда эса 43 тани ташкил қилган.

Криштиану Роналду мос равишда 2010/11 йилги мавсумда 40 та, 2011/12 йилда 46 та ва 2014/2015 йилги чемпионатда 48 та гол уришга эришган.

Жорий мавсум якунига кўра Криштиану Роналду 35 та гол уриб (36 та ўйинда), тўпурарлар пойгасида иккинчи бўлди. Лионель Месси эса 26 та гол (33 та ўйинда) билан кучли учталикка кирди.

Карим Бензема ҳамда Неймарга 24 тадан гол уриш насиб қилди. Неймар бунинг учун 34 та ўйинда майдонга тушди. Бензема эса бор-йўғи 27 та учрашувда иштирок этди.