«Челси» клуби раҳбарияти собиқ шифокор Ева Карнейро билан келишувга эришганини эълон қилиб, ундан расман кечирим сўради. Бу ҳақда клубнинг расмий сайти маълумот тарқатмоқда.

«Клубимиз доктор Карнейро билан суд ишида келишувга эришганини мамнуният билан эълон қиламиз. Карнейро, „Челси“ ва Моуринью можароси бўйича ўтказилган маҳкама жараёни ўз ниҳоясига етди. Биз Карнейронинг кетиши билан боғлиқ вазиятни юзага келганидан афсусдамиз. Доктордан расман кечирим сўраймиз” – дейилади клубнинг расмий баёнотида.

Эслатиб ўтамиз, ўтган мавсумдаги “Челси” – “Суонси” (2:2) ўйини охирида тиббий ходимлар Азарга ёрдам кўрсатиш учун майдонга чиқиб, анча ҳаяллаб қолганидан Жозе Моуриньонинг жаҳли чиққан ва у ўйиндан кейин Ева Карнейрони ҳақорат қилган эди. Шундан сўнг Карнейеро “Челси”ни тарк этиб, клуб ва Моуриньони судга берганди. Бундан ташқари, бироз олдин Карнейро “Челси” клуби билан келишувдан ва 1,2 млн фунт товон пулидан ҳам воз кечган эди.