Мамлакатимизнинг тажрибали футболчиларидан бўлган Фозил Мусаев яна “Насаф” жамоаси сафида тўп тепадиган бўлди.

Фозил Мусаев бундан аввал ҳам жамоамиз сафида фаолият юритган. Эсингизда бўлса, у 2007-2008 ва 2011-2012 йилги мавсумларда “Насаф” сафида фаолият олиб борган ва мамлакатимиз чемпионатида кумуш медаль совриндори, икки марта Ўзбекистон Кубоги финалчиси ва 2011 йили ОФК кубоги соҳиби бўлган эди. Шундан сўнг Ф.Мусаев Тошкентнинг “Бунёдкор”, Қатарнинг “Ал-Муайдар”, Тошкентнинг “Локомотив” ва Эроннинг “Сепахон” клубларида фаолият олиб борди. Шунингдек 27 ёшли тажрибали ярим ҳимоячи Ўзбекистон миллий терма жамоасининг аъзоси ҳам ҳисобланади.

Фозил Мусаев яна жонажон клубида тўп тепишга ҳоҳиш билдирди. Жамоамиз бош мураббийи ва клубимиз раҳбарияти уни сафимизга қўшиб олишга қарор қилишди. Футболчи клубимиз билан бугун шартнома имзолади.

Энди ушбу футболчи жорий чемпионатнинг иккинчи даврасидан бошлаб “Насаф” жамоаси шарафини ҳимоя қилади.

Клубимиз шунингдек айни пайтда бир қанча хорижий ва маҳаллий футболчилар билан музокаралар олиб бормоқда. Сафимизга келиб қўшиладиган янги футболчилар ҳақида сайтимиз орқали хабарлар бериб борамиз.