Исроил футбол федерацияси ЖЧ-2018 саралашидан ўрин олган Исроил – Италия (1:3) ўйинида меҳмон мухлисларнинг ҳатти-ҳаракатлари юзасидан Италия футбол федерациясига ўз эътирозини билдирди.
Гап шундаки, италиялик мухлислар мезбонлар мадҳияси янграган пайтда фашистларга хос ишора билан масхара қилиб, ёппасига ҳуштакбозлик қилишган. Маҳаллий полиция икки нафар мухлисни стадиондан чиқариб юборган, аммо ҳибсга олиб ўтирмаган. Бу можаро пайтида мухлисларнинг қилиғи фотосуратга олиниб, Италия футбол федерациясига тақдим қилинган.
Италия футбол федерацияси раҳбари Карло Тавеккио бу можарони қоралаб, ҳуқуқ тартибот органлари айбдорларни иложи борича тезроқ аниқлаб, жавобгарликка тортишига ваъда берган.
