Ўзбекистон футзал терма жамоаси дарвозабони Рустам Умаров ЖЧнинг 1-турида Панамага қарши ўйинда мағлубиятга қарамай, таслим бўлмоқчи эмас.

Ўзбекистон терма жамоасини олдинда мусобақа мезбони — Колумбия терма жамоаси ҳамда жаҳон футзал юлдузларидан бири Рикардиьно бошчилигидаги португалияликларга қарши баҳс кутиб турибди.

«Биз Панамани мағлуб этишни ва Ўзбекистон тарихидаги илк жаҳон чемпионатини ғалаба билан бошлашни жуда ҳам истагандик. Шу боис, мотивация борасида бизда муаммо бўлмади. Аксинча, майдончага чиқиб, тезроқ гол уришга ҳаракат қилдик. Назаримда, шошма-шошарлик бизга халал берди. Оқибатда керак бўлмаган хатоларга йўл қўйдик ва керакли натижага эриша олмадик», - дейди 32 ёшли дарвозабон.

«Олдимизда жиддий рақибларга қарши ўйинлар кутиб турганини барчамиз ҳис қилиб турибмиз. Колумбия — аввалги жаҳон чемпионатининг ярим финалчиси. Боз устига, у мусобақа мезбони. Португалия — Европанинг кучли жамоаларидан бири. Унинг таркибида Рикардиньо ва Кардинал каби жаҳон футзал юлдузлари бор. Ушбу жамоалар ўртасидаги биринчи тур ўйини юқори савияда бўлиб ўтди. Колумбияга ташриф буюришдан аввал қандай рақибларга қарши ўйнашимизни билардик. Бу жаҳон чемпионати ва бу ерда кучсиз рақиблар бўлмайди. Шу боис, биз қолган иккита учрашувда ўзимизнинг энг яхши ўйинимизни намойиш қилиб, керакли очколарни жамғармоқчимиз. Ишончим комил, кимга қарши ўйнашимиздан қатъи назара терма жамоамиз охиригача курашади», - қўшимча қилди Умаров.