“Бунёдкор” – “Насаф” 0:1 учрашуви якунлангач, 2000/2001 йилларда таваллуд топган ёш футболчиларимиз мураббийи – Элдор Мойлиевдан ўйин ҳақидаги фикрлари билан ўртоқлашишни сўрадик.
-Бугун ўзаро куч синашган иккала жамоа ҳам тенг кучга эга. Бизга нисбатан “Бунёдкор” жамоасида халқаро мусобақалар ҳавосидан нафас олган футболчилар кўпчилик эди. Хабарингиз бор, улар мамлакатимизнинг U-16 терма жамоасининг асосини ташкил қилишади. Шунинг учун ёш футболчиларимизни руҳан ҳам бугунги ўйинга тайёрлашга уриндик. Натижада шогирдларимиз ўйинда ўзларининг мустаҳкам иродасини намойиш этишди. Уларда ғалабага бўлган иштиёқ ҳам кучли эди. Натижасини кўриб турибсизлар, шогирдларимиз мақсадига эришди. Шогирдларимга раҳмат айтаман, кўрсатмаларимни тўлиқ бажаришга ҳаракат қилишди.
Дарвозабонимиз? Ҳа у ҳам U-16 терма жамоамиз сафида ўйнаган. Жуда тиришқоқ ва ҳозирдан маъсулиятни зиммасига ололади. Ўз устида тинмасдан ишлайди. Ўтган икки учрашувда ҳам ўз дарвозаси даҳлсизлигини сақлаб қолди. Мен шуни ишонч билан айта оламанки, шогирдларим ичида дарвозабонимиз билан бирга 4-5 нафари бемалол ўринбосарларимиз таркибида тўп тепишга тайёр бўлиб қолишди. Клубимизда мана шундай келажаги порлоқ футболчилар етишиб чиқаётганидан фахрланамиз.
Биз мураббийларга клубимиз раҳбарияти томонидан доимо катта эътибор қаратилади. Ёш футболчиларимизни тарбиялаш учун, улар билан ўқув машғулотлари ўтказиш учун, барча керакли шарт – шароитлар бекаму-кўст муҳайё қилинган. Биз мураббийлар эса ана шу ишончни ва эътиборни оқлашимиз – бош жамоамиз ва мамлакатимизнинг турли ёшдаги терма жамоаларимизга муносиб футболчиларни тайёрлаб беришимиз керак.
“Насаф” клуби олдига ҳар доим юқори мақсадлар қўйилади. Биз бу мақсадни, клубимиз фалсафасини, ҳозирдан шогирдларимизга сингдириб бораяпмиз ва шу йўлда меҳнат қилаяпмиз. Умид қиламанки, бу ҳаракатларимиз келажакда ўз мевасини албатта беради.
