ЖЧ саралаш босқичи доирасида 15 ноябрь куни бизга рақиблик қиладиган Жанубий Корея терма жамоасида таркиб борасида айрим муаммолар пайдо бўлаётганлиги маълум бўлмоқда.

Эртага корейслар Канадага қарши ўртоқлик ўйинида саф тортади. Шу муносабат билан Жанубий Кореянинг германиялик устози Ули Штилике матбуот анжуманида қатнашди.

“Қўлостимга йиғилган барча футболчилар терма жамоанинг ҳар қандай ўйинида майдонга тушишни шараф деб билишади. Нафақат футболчилар мураббийлар штабимиз ҳам худди шундай туйғулар билан ишлаяпмиз”, — дея сўз бошлади немис мутаҳассиси. “Табиийки, барча чоралар Ўзбекистонни мағлуб этишга қаратилган. Шундай бўлса-да эртага Канада устидан зафар қучиб, ўз кучимизга ишончни қайтаришимиз лозим”.

Корейс ОАВга кўра, кеча ўтказилган машғулотлар чоғида Англиянинг “Кристал Пэлас” клубида тўп сурадиган ярим ҳимоячи – Ли Чонг Йонг жароҳат олганлиги маълум бўлди. У Канадага қарши ўйинда майдонга туша олмайди. Унинг Ўзбекистонга қарши ўйинда ҳам майдонга тушиши сўроқ остида қолмоқда. Умуман олганда, жамоада енгил жароҳат олганлар Ули Штиликега бош оғриқ бўладиганга ўхшайди. Бу ҳақда германиялик мураббий шундай деди:

“Канадага қарши тайёргарлик кўраётган жамоамиз ҳақида озгина сўзласам. Афсуски, кеча Ли Чонг Йонг жароҳат олди ва эртага майдонга туша олмайди. Бундан ташқари Сон Хеунг Мин, Ки Сонг Йонг, Хонг Чол каби етакчиларимизнинг ҳам жисмоний ҳолати аъло даражада эмас. Канадага қарши ўйинга 100% тайёр бўлганларгина майдонга тушади”.

Англия Премьер-лигасида тўп сурадиган Ли Чонг Йонгнинг жароҳат олиши корейслар учун катта йўқотиш бўлади. Ҳозирча унинг Канадага қарши ўйнамаслиги аниқ. Ўзбекистон билан ўйинга ҳам унинг майдонга тушиши аниқ эмас. Сал аввалроқ бошқа бир футболчи Ли Же Сонг ҳам сафдан чиққан эди.

Корейс ОАВ маълумотлари асосида Отабек Йўлдошев тайёрлади.