Якунига етган олий лиганинг ушбу мавсумида мухлислар янги чемпион номини билиб олишди. Тошкентнинг «Локомотив» клуби ўз тарихида биринчи марта Ўзбекистон чемпиони деган номга сазовор бўлди.
Чемпионликни қўлга киритган «Локомотив» олий лигада жами 74 очко тўплади. Қизиғи шундаки, «темирйўлчилар» ўтган йил ҳам айнан шунча очко жамғарган, бироқ чемпион бўла олишмаганди. Жамоа ўтган йил «Пахтакор»дан атиги бир очко ортда қолиб, иккинчи ўрин билан кифояланганди.
Аммо бу мавсумда 74 очко йиғиш чемпионлик учун етарли бўлди. Статистикага эътибор қаратадиган бўлсак, жуда қизиқ ва деярли бир хил рақамларга дуч келамиз. Эътибор беринг, «Локомотив» бу мавсум олий лиганинг 30 ўйинидан 23тасида ғалаба қозонди, 5 марта дуранг ўйнаб, икки бор мағлуб бўлди. Жамоа ўтган йил ҳам худди шундай кўрсаткични қайд этган: яъни, 23 ғалаба, 5 дуранг ва 2 мағлубият.
Фақат тўплар нисбатида бироз фарқни кўрамиз. Бу борада бу йилги кўрсаткич: 77-24. Ўтган йилгиси эса 66-22. Демак, жамоанинг гол уришида сермаҳсуллик ошган, чунки «Локо» бу йил ўтган йилга нисбатан 11та кўп гол урди.
Яна бир қизиқ маълумот шуки, «Локомотив» уй ва сафар учрашувларида ҳам ўтган йилги билан бир хил кўрсаткичга эга бўлди. Жамоа уй баҳсларида 13 бор зафар қучиб, 2 марта дуранг ўйнади ва умуман ютқазмади. Ўтган йил ҳам худди шу ҳолат рўй берганди. Сафарда эса 10та ғалаба, 3 дуранг ва 2 мағлубият. Қизиғи, бу борада ҳам ўтган йилги рақамлар айни. Фақат тўплар нисбатида ўзгариш бор: бу йил уйда 44-8, сафарда 33-16. Ўтган йил эса уйда 37-7 ва сафарда 29-15.
Кўряпсизми, футболда бир хил натижани такрорлаб ҳам чемпион бўлиш мумкин. Фақат бунинг учун жамоадан ҳаракат ва рақибларнинг ўзаро ўйинларда қоқилиши талаб этилади.
