Бекободнинг “Металлург” аёллар жамоаси қаторасига тўртинчи мавсумни чемпионат совриндорлари сафида якунламоқда.   Биринчи мавсум шоҳсупанинг учинчи поғонасидан жой эгаллаган маъданчи қизлар кейинги учта мавсумда мамлакатимизнинг вице-чемпионлари бўлишмоқда. Бу ажойиб ютуқ билан биз “Металлург-вумен” жамоаси аъзоларини, мураббийлари, клуб раҳбарияти, муассислари ҳамда барча мухлисларини табриклаймиз!   Мамлакат миллий чемпионатини ҳам “Металлург-вумен” жамоаси қизлари кўтаринки кайфиятда, бир текис ўтказишди. Асосий рақиб – Қаршининг “Севинч” жамоасига қарши ўтказилган ҳар иккала учрашувда рақибаларига муносиб қаршилик кўрсатган бўлса-да, “Металлург-вумен” имкониятни бой бериб қўйди. Натижада жамоанинг чемпионлик орзуси муддатидан олдин барбод бўлди. “Севинч”дан ташқари яна битта ўйинда ютқазиб қўйган Шерали Бобоқулов шогирдлари сўнгги тур арафасида вице-чемпионлик масаласини ҳам муаммо остида қолдиришганди. Аммо “Андижанка”га қарши ўз майдонида ўтказилган охирги учрашувда керакли натижа – дурангни қайд этган “Металлург-вумен” (0:0) иккинчи поғонани сақлаб қолди.   Бронза медали эса кутилганидек, мамлакатимизнинг энг тажрибали, номдор жамоаларидан бири – водийлик қизлар – “Андижанка”га насиб этди.   Мазкур учта жамоадан ташқари Тошкентнинг “Бунёдкор-вумен” жамоаси ҳам медаллар учун охирги турларгача курашни давом эттиргани эътиборга сазовор. Қолган жамоалар орасида Муборак, Олмалиқ ҳамда Навоий шаҳри жамоаларини ажратиб кўрсатган бўлардик. Ғузор, Фарғона, Бухор ҳамда Тошкентнинг “Локомотив” жамоаси қизлари эса олий лигадаги мавқеларини сақлаб қолиш учун баҳс олиб боришди ва пойтахтликлар бу курашда омадсиз эканликларини кўрсатишди.